Tura/Dudhnoi, Nailar 18
Ka kynhun runar kaba la rahbor ïa u nongtei ïingmala na Tura, West Garo Hills, ka la lait da ka said hadien ka jingpyrshang jong ki pulit ban kem ïa ki dkhot ka kynhun ha Dudhnoi hynne janmiet ha ka por kumba 6:30 baje eiei.
Katkum ki tyllong khubor, ka kynhun ki runar ka la rahbor ïa utei u lanot ha ka 10 tarik Nailar na Tura. Katei ka jingjia ka la shu kut noh kumto naba bun ki pyrkhat ba utei u lanot u la leit lang bad ki paralok. Ki pulit ki la ïoh jingtip halor katei ka jingjia hadien ba ki bahaïing jong u lanot ki la sdang ïoh pdiang ïa ka jingdawa pisa na katei ka kynhun bad la ujor mukotduma ha Tura.
Ki tyllong khubor ki ïathuh ba la pynlong mardor ïa ka jingtohkit watla kim shym la lap ksai eiei ha kaba sdang.
Hynrei katei ka jingjia ka la sdang seisoh ha ka liang ka jingtohkit hadien ba u lanot – uba shong ba sah ha Assam u la ïoh lad ban phet na katei ka kynhun bad pyntip ïa kaei kaba la jia sha ka thanad ha Boko, Assam.
“La teh ïa ki kti ki kjat jong u bad la bret ïa u ha pung ban ïap. Hynrei u la ïoh lad ban pyllait im ïalade bad leit mih sha thanad Boko. Watla ki nongrahbor ki pyrkhat ba u lanot u la ïap, da kaba shim kabu ïa ka jinglong-jingman, ki la bteng ïa ki jingdawa jong ki, kumta ngi la pynap shrip ïa ki,” ong ka tyllong khubor ba halor ki pulit.
Ki pulit ki la khring ïa katei ka kynhun runar ban wan sha Dudhnoi ban shim ïa ka pisa (ba la dawa) hadien ba ki la phah wan shuwa ïa ka kynhun sha Dhupdhara. Haba ki la mynjur, la buh por ban wan pynpoi ïa ka pisa bad ha ryngkat ka jingïatreilang bad ki pulit Assam, North Garo Hills bad WGH, ka kynhun pulit kaba la phong da ki jaiñ phong kum ki ‘riew paidbah ka la ap kmang ïa katei ka kynhun runar.
Hynrei haba ki runar ki la poi hajan ka jaka ïeng bos ka Meghalaya ha Dudhnoi, ki la sngewthuh ïa ka jingdon jong ki pulit bad hashuwa ba ka kynhun pulit kan ïoh lad ban leh eiei, katei ka kynhun runar ka phet krad na katei ka jaka. Kum shi bynta ban kem ïa katei ka kynhun, la siat 3 sien (controlled shot) da ka kynhun pulit ba hadien kane, ki nongrahbor ki la ieh noh shadien ïa ka ‘Scooty’ kaba ki wan bad da kaba shim kabu ïa ka jingbun briew, ki la phet krad na katei ka jaka.
“Naba ka jaka ka long kaba hui-hui, ngim da lah ban leh eiei namar ka lah ban ïalam sha ka jingjia ka bym sngewtynnad. Hynrei mynta, ngi la ïoh ksai ba ki lah ban dei mano bad ngi khmih lynti ba shen ngin sa lapdien ïa ki,” ong u Superintendent of Police – WGH, Abraham T. Sangma.
