Shillong, Nailar 18
Ki nongïalam ka seng National People’s Party (NPP) ki la pynpaw ba kin sa peit nangne shakhmat kaei ba kin leh na bynta ki ar ngut ki MLA ka seng Congress kiba la shah pynshitom da kaba shah sospon na ka bynta hynriew snem halor ka jingkynnoh ba ki don jingïadei bad ka sorkar ba la ïalam da ka NPP.
Kine ki ar ngut ki MLA Congress kiba la shah sospon haduh hynriew snem ha ka Meghalaya Pradesh Congress Committee (MPCC) ha ka Sngi Thohdieng ki long u Bah Charles Marngar na Mawhati konstitwensi bad u Bah Gabriel Wahlang uba dei na Nongstoiñ konstitwensi.
Haba pyrshang ban ïakren bad ki katto katne ki nongïalam ka seng NPP ki bym kwah ban pynpaw kyrteng ki la ong ba ka jingleh ka seng Congress ban sospon ïa ki ar ngut ki MLA ka long kumba ki lehbeiñ ïa ki paidbah jong kitei ki konstitwensi kiba donkam ïa ka roi ka par.
Ka jingsospon ka Congress ka long namar ba ka seng ka la kam ba ka la ïoh jingtip ba kitei ki ar ngut ki MLA ki la thmu ban rung sha ka seng NPP hadien ba ki la don ka jingïadei kaba jan bad ka sorkar jylla. Nalorkata, ka MPCC ka la kynnoh ïa kine ki arngut ki MLA ba ki la ïaleh pyrshah ïa ka seng.
Sa ha kawei pat ka khubor, ki nongïalam ka NPP ki la pynpaw ba lada ïa ki MLA ka Congress kiba dei ruh ki MDC ki shah beh seng tang namar ba ki ïajan bad ka NPP, ka NPP ruh ka lah ban kyntait noh ïa ki MDC ka Congress ban ïatreilang ha ka Executive Committee ba la ïalam da u Bah Pynïaid Sing Syiem kum u CEM.
Shuh shuh ki nongïalam NPP ki la pynpaw ba lada ki MDC Congress ki lah ban ïatreilang bad ka NPP ha KHADC, balei ki MLA ka Congress kim lah ban ïajan bad ki nongïalam ka NPP ha ka jylla.
Ki MLA ka Congress kiba long ruh ki MDC ha kajuh ka por ki don lai ngut kiba kynthup ïa u Bah Charles Marngar, Bah Gabriel Wahlang bad u Bah Ronnie V Lyngdoh, katba u Bah Pynshngaiñ N Syiem uba bat mynta kum u Deputy CEM u long tang kum u MDC. U Bah Pynshngaiñ u bat ruh kum u Working President ka Meghalaya Pradesh Congress Committee. U Bah Charles u dei ruh u Deputy Chairman ka KHADC.
Ka khubor na ki nongïalam ka NPP ka ïathuh ba lada ka seng NPP kan kdup lang ïa ki ar ngut ki MLA kiba shah sospon bad kiba long ruh ki MDC, ka Congress kan sah satang ar ngut ki MDC kata u Bah Ronnie bad Bah Pynshngaiñ.
