Shillong, Nailar:
U President ka Hills State People’s Democratic Party (HSPDP) Bah K.P Pangniang u la ïathuh ba ka Regional Committee, West Khasi Hills District kaba la dep ïa shong jingïalang ka kwah ba ki hynñiew tylli ki shnong basah ki Nepali bad kiwei kiwei ki jaidbynriew kiba hap ha Langpih Sector kin hap sha Meghalaya ha ka jingïapynbeit pud bad ka jylla Assam.
Haba ïakren bad ki lad pathai khubor, u Bah Pangniang u la ïathuh ba ka seng HSPDP ka la leit ban ïakynduh ïa u Myntri Rangbah ka Jylla u Conrad Sangma ha Secretariat ban pynkynmaw biang ïa ka jingpynbeit pud ka jylla Meghalaya bad Assam ha ka bynta ba ar kaba don hynriew tylli ki sector.
U la ïathuh ba ha kane ka jingïakynduh ïa u Conrad u la pyntip ba un sa shong jingïalang bad u Myntri Rangbah ka Assam u Himanta Biswa Sarma hadien ba ka kut ka dorbar synrai ka ban sa long mynta u bnai.
Haba kylli halor ka jingmih khubor ba ki don ki shnong kiba kwah ban hap ha jylla Assam, u Bah Pangniang u la ïathuh ba ka Regional Committee ka West Khasi Hills kaba hap ha Langpih Sector kim kwah ba ki shnong kiba hap ha Meghalaya kin hap ha Assam.
U la ïathuh ba ki shnong Nepali ki don haduh 7 tylli bad ka jingdon briew ka long palat 5000 hajar ngut hynrei ïa ki la ker da ki shnong Khasi. Kumta kim kwah ba kin leit sha Assam hynrei kine ki jaidbynriew ki la kular ban don ha Meghalaya lada ki ïoh ka jingshngaiñ bad ïoh ïa ka hok kum ki nongshong shnong.
U Bah Pangniang u la ïathuh ba mynshwa ka don ka jingïatyngkhuh ki Nepali bad ki sengbhalang hynrei mynta ki la sngewthuh khnang ban nym wanrah ka jingeh ïa ka Langpih khnang ki jaka kin hap ha Meghalaya.
Katba u Bah Panbor Ryntathiang, Secretary ka HSPDP, u la ïathuh ba ka jingleit ïakynduh ka seng ïa u Myntri Rangbah ka jylla u Conrad Sangma ka long ban pynkylla noh ïa ka Meghalaya State Language Act 2005 ban pynlong noh ïa ka ktien Khasi kum ka Official Language namar haduh mynta ka jingduhnong ïa ki samla wad kam namar ka dei tang ka Associate Language.
U la ïathuh ba ka jingkwah ka seng ban pynkylla sha ka Official Language namar ha ka eksam ki nongsam dak ne sam shithi kiba bun ki nongkyndong kim don kiba lah namar ka eh haba thoh ïa ka ktien phareng.
“Ngi la wan ïakynduh ïa Senior Post Master uba la ïathuh ba ki peit ïa ka mark ha ka Hindi bad ïa ki Khasi ki peit ha ka English namar ka dei ka Official Language, kumta ngi kyrpad ïa u Conrad ban pynkylla Official Language ïa ka ktien Khasi khnang ban suk ki samla haba thoh ïa ka ktien lajong” u la ong.
