Tura, Nailar 18
Ha ka jingkhynra ba-heh pyrshah ïa ki karkhana ot-dieng ba treikam be-aiñ ha ki jaka thor jong ka thaiñ, ka tnad khlaw ka GHADC dang shen ka la khang khyrdep ïa 2 tylli ki karkhna ot-dieng ba treikam be-aiñ hapoh ka thaiñ Phulbari, West Garo Hills – kaba la ïalam sha ka jingkurup ïa ki tiar be-aiñ.
La pynlong ïa 2 tylli ki jingkhynra hapoh ka jingïalam u Range Forest Officer ka Phulbari ha ka 16 tarik Nailar, ha ka shnong Masangpani bad Nimaikata ha kaba la kurup noh ïa bun bah ki tiar be-aiñ. Katei ka jingkhynra ka la urlong hadien ka jingpeitngor kaba na ka por sha ka por bad ki jingujor na ki nongshong shnong haba ïadei bad ki kam be-aiñ kiba ktah ïa ka mariang.
“La lap ba ki karkhana ot-dieng ki treikam be-aiñ khlem ki laisen ba biang bad ki synñiang sha ka jingpynkhyllem dieng bad ka jingshim kabu kaba khlem jingbit ïa ki dieng. Ngi long la kloi ban ïada ïa ki khlaw jong ngi bad ngin ym pdiang ïa ki kam be-aiñ kiba buh jingma ïa ki sawdong-sawkun mariang jong ngi,” maham u Range Forest Officer.
Katkum ka jingbatai utei u ophisar, katei ka jingkhynra ka long kum shi bynta jong ka jingpyrshang ka tnad ban tehlakam ïa ka jingpynkhyllem dieng bad ban kyntiew ïa ki rukom treikam ki ban pynneh-pynsah ïa ki khlaw hapoh ka thaiñ.
“Ki tiar ba la ïoh kurup kin long kum ki sabut haba ïadei bad ka jingtohkit bad yn sa leh ïa kaba donkam katkum ka aiñ pyrshah kito kiba donkti ha ka jingpyntreikam be-aiñ ïa kine ki karkhana ot-dieng,” u la bynrap.
Ka jingkhynra ïa kitei ki 2 tylli ki karkhana ot-dieng ba treikam be-aiñ ka la ïalam ruh sha ka jinglap ïa palat 100 CFT ki dieng bym dei ‘Sal’ kum u Poma, Sisodiya bad kiwei ba shong dor kumba T.800/- shi CFT.
Ha kawei ka liang, ka tnad ka la kyntu ïa ki nongshong shnong ka thaiñ ban pyntip halor kino-kino ki jing-i-suba ba ïadei bad ka jingshalan dieng be-aiñ ne ka jingtreikam jong ki karkhana ot-dieng, da kaba kdew ba ka jingdon bynta lang jong ka imlang-shalang ka long kaba donkam ban ïakhun pyrshah ïa ki kam be-aiñ ba ïadei bad ka mariang.
