Shillong Nailar 18
Ka jingthmu jong ki ar ngut ki MLA ka Congress ban leit rung noh sha ka National People’s Party (NPP) kaba ïalam ïa ka Sorkar MDA ka lah ban dkoh noh hadien ba ki la shah sospon noh ha ka seng haduh 6 snem.
Ki ar ngut ki MLA ka Congress kiba la shah sospon na ka seng haduh 6 snem ki long u Bah Charles Marngar uba dei u MLA ka Mawhati bad u Bah Gabriel Wahlang uba dei u MLA ka Nongstoiñ konstitwensi.
Ka tyllong khubor ka ïathuh ba kam long kaba suk mynta ïa kine ki MLA lane ïa ka seng saiñpyrthei kaba thmu ban tan ïa ki hadien ka jingshah sospon noh ha ka seng kaba ki la shah jied kum ki MLA ha u snem 2023 namar ka jingkynnoh ba ki leh ïa ki kam ïaleh pyrshah seng, khamtam ka jingpynïajan jong ki bad ka Sorkar MDA.
Kumba ka long mynta, kine ki arngut ki MLA ki dang dei hi ki MLA ka Congress namar ki shu shah sospon ha ka seng, bad ïa ka rai ban weng ïa ka jingsospon lah ban weng ha kano kano ka por.
Ka Congress ka don 4 ngut ki MLA bad lada dei ban leit ïalong kawei bad kino kino ki seng saiñ pyrthei, donkam ban ïoh 2/3 ki MLA na ki 4 ngut ki ban leit lang khnang ban lait na ka jingshahteh ha ki kyndon jong ka aiñ kaba khang ban kyntiap seng.
Kane ka jingshah teh ki MLA ka dei namar ka jingdon ka aiñ kaba khang ban leit ïasoh bad kano kawei pat ka seng saiñ katba ki sngow mon maki.
Ki arngut ki MLA ka Congress kiba khlem don ha ka thup ban leit rung sha ka NPP haduh mynta ki long u Dr Celestine Lyngdoh bad u Bah Ronnie V Lyngdoh, uba dei ruh u nongïalam ka Liang Pyrshah ha Ïingdorbar Thawaiñ ka Jylla.
