Nongstoiñ, Nailur 18
Ka District Congress Committee ha ka Sngi Saitjaiñ jong ka taïew ka la ïoh ban thung ïa u Bah Eric Kharsyntiew kum u President ba shipor jong ka Nongstoiñ Block Congress Committee (NBCC).
Ha katei ka sngi, u President ka DCC, u Bah Bormanding Nonglang u la aiti ruh ïa ka ‘Appointment Letter’ sha u Bah Eric.
U Bah Bormanding Nonglang, President ka DCC u la ong ba ka jingpynlong ïa ka EC jong ka DCC ka long na bynta ban pynkhlaiñ ïa ka jingtreikam jong ka Congress ha baroh lai tylli ki Block kynthup ïa ka Nongstoiñ, Mawshynrut bad ka Rambrai Jyrngam bad kyrpang eh na ka bynta ka Nongstoiñ Block ha kaba da ka jingïasngewthuh lang la ïoh ban thung ïa u Adhoc President jong ka NBCC.
U Bah Bormanding u la ong ruh ba ha kine ki khyndiat sngi ba la lah, ka NBCC ka la shong ïa ka jingïalang ha Bishop Hall, Nongstoiñ bad u Bah Gabriel Wahlang u la ieh noh ïa ka kam kum u President bad u la phah noh ïa ka kot iehnoh kam sha ka distrik, bad halor kane ka nongrim, la ïoh ban thung ïa u Bah Eric Kum u President ba shipor, bad u Bah Bormanding u la kam ruh ba na ka liang ka DCC khamtam ma u kum u President um shym la ïoh ïa ka jingpyntip halor katei ka jingïalang.
U la ong ba ha katei ka Executive Committee jong ka DCC, la ïakren ruh ïa ka shithi ïa kaba na ka liang jong ka MPCC bad ka AICC ka la pyntip ba ïa u Bah Gabriel Wahlang la sospon haduh 6 snem bad ka DCC ka la pdiang kumba ka long.
U la ong ruh ba ha kane ka sngi, ka ïing ka la mynjur ruh ban pdiang sngewbha ïa u Bah JTS Thongni, MDC barim ka Rambrai Jyrngam konstitwensi ïa ka jingtyrwa ban wan phai biang sha ka sem barim bad ha kajuh ka por la thung ruh ïa u Bah Forteenson Lyngkhoi kum u General Secretary ka District Congress Committee ba un khmih ïa ka Mawshynrut Block Congress Committee.
Lah ban kdew hangne, ba ha ka 8 tarik u bnai Nailur 2024 ka Nongstoiñ Block Congress Committee ka la pynlong ïa ka General Meeting ha Bishop Hall, Nongstoiñ bad na bynta ban pynïaid shaphrang ïa ka seng Congress bad ban nang pynkhlaiñ, u MLA uba long ruh u President ka NBCC ha katei ka por kaba um shym la pat shah sospon, u la aiti noh ïa ka kam President sha u Bah Dles Marbañiang ha ryngkat kiwei pat ki nongkitkam kiba la bsuh lang bad nang pynkhlaiñ shuh-shuh ïa ka seng hapoh konstitwneis ha kaba ïa kane la ïoh ruh ïa ka jingmynjur lang na ki nongkitkam ha katei ka General Meeting.
Hynrei kane ka jingaiti jong u Bah Gabriel ïa katei ka kam President ha katei ka sngi ka la shu long sepei, ha kaba mynta ka DCC ka la thung pat ïa u Bah Eric kum u Adhoc President.
