Shillong Nailar 18
U MP ka Tura, u Saleng A Sangma, u la paw lang kum u nongrwai ha kawei ka jingrwai ban ïakhun pyrshah ïa u drok kaba kyrteng ka Rakbo Gisik’ bad kane ka jingrwai ka la don ruh ha YouTube.
Kane ka jingrwai kaba la rwai ha ka ktien Garo da u MP ka Tura ha ryngkat ka jingsynrop sur lang bad kiwei pat, ka don ha YouTube ha ka kyrteng ‘FRIENDS 1977’.
Ki dur khih kiba la pyni ha YouTube ha ryngkat kane ka jingrwai ki batai shaphang ka jingngop ha u drok bad ka jingma ïa ka ïing ka sem bad ka imlang sahlang haduh ban da poi sha u pud ban tuh tiar na la ïing.
Hynrei la pyni ruh ïa ka bynta jong ka jingkylla bamut noh bad im biang ka jingim kaba beit ha ka imlang sahlang.
U Saleng u la long u nongrwai bakongsan naduh basdang haduh ban kut kane ka jingrwai kaba jrong kumba 4 minit, 49 sekon.
Kiba la dep ban peit ïa kane ka jingrwai ha YouTube ki la thoh ïa ki kyntien ïaroh ia kane ka jingrwai bad don ruh kiba la ïaroh ïa u MP uba la shimbynta ban rwai khamtam eh ka jingrwai kaba dei shaphang ka jingïakhun pyrshah ïa u drok uba long shisha ka jingma ïa ka jaitbynriew, ka Jylla bad ka ri.
