Shillong, Nailar:
U Myntri Rangbah ka Jylla, u Conrad K. Sangma ha ka Sngi Ba-ar u la plie ïa ka ‘Oyster Mushroom Cluster’ ha Mendipathar, North Garo Hills.
Kane ka projek, kaba la mang ha ka jinglut kaba T.10 klur, ka thmu ban ai mynsiem ïa ka jingrep tit. Lyngba kane ka sienjam, kumba 1000 ngut ki nongrep kin ïoh jingmyntoi ha ka kylla banyngkong. Ïa kane ka projek la pyntrei da ka Mendipathar Multipurpose Cooperative Society, hapoh ka jingïalam ka Sister Rose, bad la bei tytngka da ka skhim SFRUTI jong ka MSME, ha ryngkat ka jingkyrshan kaba T.3 klur na ka Sorkar Jylla.
Haba kren ha ka jingïalang, u Myntri Rangbah u la ong ba ka jingdawa na bynta u tit ka la nang kiew ha pyrthei baroh kawei, bad ka jingpynïeng ïa kaba kum kane ka shnat treikam kan long ka jingïohnong ïa ki nongrep. U la ong ruh ba ka Sorkar ka la sdang ïa ki prokram bapher-bapher ban kyrshan ïa ki nongrep.
Haba pynshlur ïa ki nongrep ban phai khmat sha ka kam rep tit, u Sangma u la ong ba ka Sorkar kan sa ai ka jinghikai bad jingkyrshan sha kito ki ‘riew shimet bad kynhun kiba don ka mon ha kane ka kam. Ha kane ka prokram, u Myntri Rangbah u la kaweh lama ruh ïa ki kali ‘Pick-up’ bad ki top ki ban pyndonkam ban lum ïa ka jri.
U la kdew ba ka North bad East Garo Hills ki ïadon bynta ha ka ban pynmih bun bah ka jri bad ka Sorkar kan kyrshan ïa ki nongrep ban kiew ha ka jingïohnong.
Shuh shuh la mang na bynta ka ‘Rubber Cinx Unit’ sha ka Mendipathar Multipurpose Cooperative Society.
