Shillong, Nailar 18
Ka North Eastern Hill University Teachers’ Association (NEHUTA) ka la phah jingthoh sha ka National Commission for Schedule Tribes (NCST) jong ka Sorkar India ban dawa weng kam ïa u Vice-Chancellor (VC) ka NEHU, u Prof. P.S. Shukla halor ki jingkynnoh kam pyrshah ‘riewlum bad trai-ri jong u.
“Ngi la pynkhreh ka jingthoh ha ryngkat ki jingtip ba bniah halor ki kam pyrshah ‘riewlum bad pyrshah trai-ri jong u VC ka NEHU. Ha ki 3 snem ka jingshakri jong u, u VC u la pynduh lad noh ïa ki ‘riewlum ka Meghalaya na bynta ban synñiang sha ka jingkiew jong ka NEHU, ha kawei ka liang kaba la ktah ïa ka jingtreikam jong ka skulbah,” ong u President ka NEHUTA, Prof. Lakhon Kma ha ka jingthoh ba la phah sha u dkhot ka NCST, u Nirupam Chak-ma.
U la ong ba u Prof. Shukla u la kynriah na ka jingthmu jong ka imlang-sahlang bad ka ïoh ka kot, pule-puthi bad ka roi ka kiew ha ka lariti jong ka Meghalaya bad ka Thaiñ Shatei Lam Mihngi da kaba leh shiliang pyrshah ïa ki kyrtong na ki jaidbynriew trai-ri bad ka thaiñ haba phai sha ka jingpyndap ïa ki kam kum ka Deputy Registrar, Registrar, bad Finance Officer.
Haba phai sha ka jingthung ïa ki Dean, ka seng ka la ong ba u Prof. Shukla u la leh bakla shi kat dei da kaba thung biang ïa u/ka Dean ba la dep thung shisien, School of Social Sciences sha kawei pat ka samoi treikam katba ïa ki jingkheiñ jong ki trai-ri kiba la bit la biang bad kiwei-kiwei ki Professor la dep pynbiang.
“Kane ka dei ruh ka jingkyntait ïa ki Professor trai-ri kiba la bit la biang na Meghalaya bad ka Thaiñ Shatei Lam Mihngi bad ka jingpynkheiñ ïa baroh ki mat treikam bad ka NEHU Act, ki Statute, Ordinance bad Regulation,” ong u Prof. Kma.
U la kdew ruh ba ha u snem ba la dep, u Prof. Shukla u la thung ïa kumba 87 ngut ki nonghikai thymmai ha kaba wat tang 10% ruh kim dei na Meghalaya ne ki jaidbynriew trai-ri.
“Dei ha kane ka rukom, u Prof. Shukla u thmu ban rat dyngkhong ïa ki samla pule trai-ri bad nonghikai ha ka liang ka lariti bad pule-puthi na Meghalaya bad ka Thaiñ Shatei Lam Mihngi da kaba noh sha ki kyrtong na kawei pat ka thaiñ ha ka rukom kaba shah liang,” u la ong.
Ka NEHUTA ka la ong ruh ba u VC naduh ba pynïasoh sha ka NEHU, um shym la pynlong ïa kano-kano ka ‘interview’ hapoh ka Career Advancement Scheme (CAS) na bynta ka kyrdan 5 haduh 6, ha kawei ka liang kaba khang lad ïa ka jingkiew kyrdan jong palat 15 ngut ki Professor trai-ri ba la slem ha ka kam, kiba la shongthait noh khlem da ïoh ïa ka jingsiew jong ki.
Ha kajuh ka por, ka seng ka la kynnoh ruh halor ki jingthung kam bapher-bapher jong u VC da kaba pynkheiñ ïa ki kyndon thung kam jong ka skulbah.
Haba kdew ba naduh ba shimti kum u VC ka NEHU, u Prof. Shukla um shym la lah ban wanrah ïa ki projek ne skhim thymmai na bynta ban kyntiew ïa ki jaidbynriew trai-ri jong ka NEHU bad Meghalaya ha ki 3 snem ba la dep, u Prof. Kma u la ong ba ym shym la don Hostel, Quarter, bad kiwei-kiwei kiba la tei thymmai bad kiba la don lypa ruh ki la tlor, kaba buh jingeh pat ïa ki smala trai-ri bad nongtrei kumjuh.
Haba kynnoh ba u Prof. Shukla u la pynhiar kyrdan ïa ka NEHU, u la ong, “Haba u la pynïasoh kum u VC ka NEHU ha u Naitung 2021, ka kyrdan ka NEHU katkum ka National Institutional Ranking Framework (NIRF) ka tnad pule-puthi, ka Sorkar India, ka long 59; ka la hiar sha ka 66 ha u 2022; 80 ha u 2023 bad ka jinghiar kaba shaba palat jong ki 56 kyrdan, kata 136 ha u 2024. Kane ka pyni shai ïa ka jingbym larkam jong u ha ka ban kynthup lang ïa ki trai-ri ka Meghalaya ban pynbha ïa ka jinglehbha jong ka NEHU.”
“Ha ka jingsngew jong ngi, ka NEHU ka la sakhi ïa u VC u bym ler tam ha u Prof. P. S. Shukla da ki phew snem – u bym sngewthuh, uba leh ba-heh bad u bym don jingsngew ïa ki trai-ri bad uba kloi ban pynkheiñ ïa ki mat treikam bad ka NEHU Act, ki Statute, Ordinance bad Regulation. Namar kane ka rukom treikam donbor da kaba pyndonkam bakla ïa ka bor kum u VC bad ban ïada ïa ka NEHU, ki kolej ba pynïasoh bad ka, ki samla pule bad ka skulbah baroh kawei – ngi la dawa hiar shuki ïa u,” ong utei u nongïalam ka NEHUTA.
Shuh shuh ka seng ka la dawa na u dkhot ka NCST ban weng kam mardor ïa u VC na bynta ka bha ka miat jong ka NEHU bad ki trai-ri ka Meghalaya kumjuh ka Thaiñ Shatei Lam Mihngi.
