Shillong, Nailar 18
Ka Khasi Students’ Union (KSU) East Jaiñtia Hills Unit ha ka 17 tarik Nailar ka la leit ban jurip ïa ki jingker saiñar shiah (border fencing) ba don ha shnong Lailong bad ruh ban ai mynsiem ïa saw tylli ki Dorbar Shnong khappud kiba kynthup ïa ka Lejri, Lahaleiñ, Huroi bad Hingaria.
Ka jingleit jurip ka long ban ai mynsiem halor ka nongrim ban pyrkhing ïa ka jingwan rung be-aiñ ki mynder na Bangladesh ha kaba kane ka ri ka la don hapdeng ka jingïaumsnam bashyrkhei dang shen.
Ha kane ka sngi ka seng ka la ïoh ban pynlong ïa ka jingïalang ha ka shnong Huroi ha kaba la wan ïashim bynta da baroh ki saw tylli ki shnong kiba mihkhmat da ki Waheh Shnong bad Secretary shnong bad ki lai tylli ki shnat treikam ka seng naduh ka KSU Lejri Unit, KSU Huroi Unit bad ka KSU Hingaria Unit.
Ha kane ka jingïalang ka seng ryngkat ki Dorbar Shnong ki lah ïoh ban ïathir bad ïamir jingmut kumno ban pynrkhing shuh shuh ïa ka jingwan rung ki mynder na Bangladesh.
Ha ka jingïakren bad ki Dorbar Shnong bad ki Unit la sngewthuh ba haduh mynta ka jinglong jingman ha ki thaiñ khappud kiba kine ki Dorbar Shnong ki don ka dang biang, hynrei ka shu don tang ka jingjynjar ha ka kam khaïi pateng. Ka seng ka la ïoh ruh ïa ka jingpynsngew na ka KSU Hingaria Unit ba ha ka thaiñ bad shnong Hingaria, ki BSF kim shym la shong ha khappud, hynrei shapdeng surok kaba jngai kumba 3 ne 4 kilometre bad la pynpaw ruh ka jingeh ba na kine ki thaiñ ki shait kham ïoh rung bha ki nong Bangladesh ha ki por ba la leit bad ki la ju don ruh ki briew bad kynhun kiba long mynnong ban pynrung ïa ki nong Bangladesh da kaba ïakren sngewthuh lyngba ki sbai rupa.
Ka seng shen kan sa hiar khnang sha kane ka thaiñ ban ïasyllok kyrpang bad kine ki shnong khnang ban lah ban pynrkhing ïa ka jingrung ki mynder.
Shuh shuh ha katei ka sngi, ka KSU ka la leit ban jngoh ruh ïa ki Border Outpost Huroi bad Lailong bad ruh la ïoh ban ïamir jingmut bad ki heh ka BSF ba don ha kitei ki BOP shwa ban jurip sha Border Fencing. Ha ka jingïakren bad u SI jong katei ka BOP u la ïathuh ba haduh mynta ym pat don ka jingrung hynrei kin ïai peit pyrman bha. U la ïathuh ruh ba ju don kita ki mynnong kiba leh ïa kine ki kam pynrung briew na Bangladesh bad ïa kine lada lap yn leh tyngeh katkum ka aiñ.
Ka seng kan sa hïar rung sha ki katto katne tylli ki shnong khappud bad ka Bangladesh ha ki sngi ki ban wan kiba kynthup ïa ka Kuliang, Donaskur, Dona Umbluh Ampyrdit ha kaba kine ki long ki jaka kiba shait lailan bha ki nong Bangladesh ban rung lyngba ki mynnong.
Kyntang ïawai ka seng kan ïai peit pyrman bad ruh kan ïai ai ka kti kamon kti kadïang ïaki dorbar shnong ki thaiñ khappud.
Ka seng ka buh ruh ka jingmaham ïa ki paradoh parasnam jong kito ki shnong khappud ba kim bit satia ban rung shabar ka jingker (Fencing) ha khappud namar ba katkum ka jingïathuh ki BSF ba ki Bangladesh Border Guard (BGB) ki la ïoh jingbit ban siat beit kat kiba tam ïa u pud.
Na ka liang ki Border Security Force (BSF) jong ka Ri India ruh ki la ïoh jingbit ban siat beit ïa ki nong Bangladesh lada ki tam shapoh u pud jong ka Ri.
Kumta la kyntu ïa ki paradoh parasnam kiba don ha ki khappud ba kin husiar bad ban ym tam pud ïoh don ka jingjia ba sngewsih. Kane ka long ka kyrwoh khubor na u Publicity Secretary ka KSU EJHDU, u Hamewanpynhun Ryngkhlem.
