Jowai, Nailar 18
Ka All Jaiñtia Muster Roll Workers and Labour Union, Central Executive Body ha ka 17 tarik Nailar ka la pynlong ïa ka Annual General Meeting kaba 9 ha ka shnong Shangpung ha ka jingdonlang u Myntri ka Sorkar Jylla bad MLA ka thaiñ, Bah Comingone Ymbon kum u kongsan.
U Bah Comingone Ymbon haba ai jingkren u la pyntip ba shen ka Sorkar kan sa pynkiew noh ïa ka bainong ki nongtrei ‘Muster Roll’ bad ka tnad Labour ka la dep ban wanrah ïa kane ka mat bad na ka liang ka Sorkar ruh ka la dep ban shong ïathir sani na ka bynta ban kyntiew ïa ka bai bylla sngi.
U Adviser ka Synjuk ki nongtrei Muster Roll, u Khroo L. Pariat, ka President, Kong Dayoowanphi Ïakai, General Secretary Hunbeitki Dkhar, Jerry Anderson Suting ki la pynsngew ïa ki jingeh bad jingïaid lynti bad jingeh jong ka seng.
Ha kane ka sngi ki la aiti ruh ïa ka dorkhast ban pyntreikam noh ïa ka ‘Regular Casual Workers Scheme 1996’, ban pynthymmai ïa ka rta shongthait ki nongtrei ‘Muster Roll’ na ka 58 snem sha ka 60 snem ka rta, ban pyntreikam ïa ka Maternity Benefit Act, 1961 kaba la pynkylla ha u snem 2017 bad kumjuh ban pyntreikam ïa ka Employees Provident Fund. Ha kane ka jingïalang paidbah la pynsngewthuh halor ka jingpang HIV/AIDS. U ‘riew shemphang uba long u Deputy Director (IEC and Mainstreaming) Meghalaya AIDS Control Society, Bah Ajoy Lanong u la kren bad ïathuh ïa ka tynrai bad kumno ban ïada na ka jingpang HIV/AIDS.
