Shillong Nailar 19
U Lamphang ka Ïingdorbar Thawaiñ ka Jylla, u Thomas A Sangma, ha ka Lah Sngi U Blei u la ai ka jingithuh ïa ka jinglong kawei lane ‘merger’ jong ki lai ngut ki MLA ka Congress bad ka National People’s Party (NPP) ha kaba u la kam ba kine ki lai ngut ki MLA ki la phah jingthoh ha ka 14 tarik Nailar, 2024 ban pyntip ba ki la long kawei bad ka NPP.
Kine ki lai ngut ki MLA ka Congress kiba la kylla mynta kum ki MLA ka NPP ki long u Dr Celestine Lyngdoh na Umsning konstitwensi, u Bah Gabriel Wahlang na Nongstoiñ konstitwensi bad u Bah Charles Marngar na Mawhati konstitwensi.
Ha ka rai kaba u Lamphang u la pynmih mynta ka sngi, u la kdew ba kine ki lai ngut ki MLA ka Congress ki la pynurlong ïa ki kyndon jong ka jingbunpaid kaba long 2/3 lane ‘two-third majority’ ban ïalong kawei bad ka NPP, kata ka long, 3 ngut na ki 4 ngut ki MLA ki la ïalong kawei bad ka NPP kaba ïahap ruh bad ka Para 4 jong ka Tenth Schedule ka Riti Synshar ka ri India.
U Lamphang u la ong ba ïa ka jingthoh kaba la phah da kitei ki lai ngut ki MLA ha ka 14 tarik Nailar, 2024 la buh ha ka shlem treikam jong u ha ka 16 tarik Nailar, 2024 na ka bynta ban khmih bniah da ma u kum u Lamphang. Kumta u Lamphang u ong ba u la khot ruh markhmat ïa baroh lai ngut ki MLA mynta ka sngi (19 tarik Nailar, 2024) ban pynthikna halor katei ka jingthoh kaba ki la phah sha u.
Hadien ba la pynthikna bad khmih bniah lut nadong shading, u Lamphang u la pynbna ba u la ai jingithuh ïa ka jinglong kawei jong kitei ki 3 ngut ki MLA ka Congress bad ka NPP namar ka jinglah jong ki ban pynbiang ïa ka jingbunpaid kaba long 2/3 lane ‘two-third majority’. Kumta u la pyntip ruh ïa ka jaka shong jong kine ki lai ngut ki MLA hapoh ka Ïingdorbar Thawaiñ yn ithuh kum ki MLA ka NPP.
Kum ban pynkynmaw, ka Congress ka la sospon haduh 6 snem ïa ki ar ngut ki MLA ka Congress, kita, u Bah Gabriel Wahlang bad u Bah Charles Marngar ha ka 16 tarik Nailar, 2024 namar ka jingkynnoh ba ki la leh ïa ki kam kiba long pyrshah ïa ka seng khamtam ka jingpynïadei bad ka Sorkar MDA.
Hynrei ïa u Dr Celestine Lyngdoh ka Congress ka khlem sospon halor ka nongrim ba u dang wan sha ka jingïalang kaba la khot da ka seng ha ka 16 tarik Nailar, 2024.
Ha kawei pat ka liang, u Dr Celestine u la ong ba ka jingïasoh jong ki lai ngut ki MLA ka Congress sha ka NPP ka dei ka rai kaba la shim lang da baroh lai ngut ba ka daw ka long ban kyntiew ïa ki kam pynroi ha ki konstitwensi jong ki.
U la ong ruh ba na ka liang jong u, u la dep pynpaw hakhmat ki nongïalam ka Congress haba u shah khot ban leit sha ka jingïalang ha Congress Bhavan ba ka don ka jingkhot ban ïasoh noh bad NPP.
Haba kylli, la ka jingshah sospon ki 2 ngut ki MLA ha ka Congress bad ka jingwan lang jong u sha ka NPP kan don jingktah ne em katkum ki kyndon aiñ, u Dr Celestine u la ong ba kane kan nym don jingktah satia namar na ka liang jong ki baroh lai ngut ki la dep phah shwa ma ki ïa ka jingthoh sha u Lamphang ka Ïingdorbar Thawaiñ naduh ka 14 tarik Nailar 2024, hynrei namarba ka 15 tarik Nailar ka dei ka sngi shuti, u Lamphang u la ïoh ban peit ïa ka jingthoh ha ka 16 tarik Nailar.
