Shillong, Nailar 19
Ki paidbah nongshong shnong jong ka Shnong Lumshyiap ki la mih shakhmat ban pynpaw ïa ka jingeh kaba ki la ïakynduh na ka daw jong ka jingbym ïoh ïa u khaw rashon kaba la don mynta la kumba katto-katne bnai eiei.
Haba ïakren bad ki nongthoh khubor ha ka Lah Sngi U Blei, na ka liang ki katto-katne ngut ki longkmie ki la pynpaw ïa ka jingsngewsih kaba khraw na ka daw ba kum ki longïing kim ïoh satia ïa une u khaw uba ki dei hok ban ïoh mynta la katto-katne bnai.
Kitei ki longkmie ki la pynpaw ba naduh ba sdang jong une u snem bathymmai mynta, ki dang ïoh ïa u khaw rashon tang jong u bnai banyngkong, ba-ar bad bad ba-lai bad hadien kine ki bnai, kitei ki longïing-longsem ki khlem ïoh shuh satia ïa u khaw rashon bad ki la pynpaw ruh ba kum ki nongshong shnong ki dawa ba ka la dei ka por ban weng noh ïa kawei ka briew kaba sam khaw rashon hapoh katei ka shnong khnang ba kan ïaid beit ïaid ryntih ka jingsam khaw bad ba ki nongshong shnong kin nym ïakynduh jingeh satia.
Kitei ki longkmie ki la ong na ka daw ka jingbym ïoh ïa u khaw rashon ka la pynlong ïa ki ba kin shu pan ram pan shah kat na shaba don tang ban shu thied khaw kilo noh na dukan tang ban lait na ka jingshah thngan ki khun ki kti.
Na ka liang kitei ki longkmie ki la pynpaw ba ki lah dei ban wan ïakynduh ïa katei ka briew kaba sam khaw rashon hapoh ka shnong hynrei ka jubab kaba ki la ïoh pdiang ka long ba kan sa sam shi sam ïa u khaw hynrei watla la kut sa u snem ruh, ki nongshong shnong kim pat ïoh satia ïa u khaw rashon.
“Ngi ki nongbam khaw rashon na kane ka Lumshyiap, ngi ong ngim kwah shuh da kijuh ki nongsam khaw rashon, ngi la kwah noh da kiwei,” la ong kitei ki longkmie
Na ka liang ka Executive Committee (EC) jong ka Shnong Lumshyiap, haba kren bad ki nongthoh khubor halor kane ka jingeh kaba ki paidbah ki ïakynduh, ka la ong ba kum ka shnong ka sngewsih ban ïohi ïa ki nongshong shnong ba ki ïakynduh jingeh tang na ka daw ba kim ïoh ïa u khaw u ba ki dei hok ban ïoh ha kine ki bnai ba la dep, kaba la wanrah ka jingeh ban pynbiang ïa ka ïing ka sem jong ki namar kiba bun napdeng ki nongshong shnong ki dei kiba bylla mynsngi bad bam mynmiet.
Na ka liang u Rangbah Shnong, u Bah Phira Khongphai, u la ïathuh ba u Fair Price Shop (FPS) Dealer, u Bah Danny Kharlukhi um shym la sam ïa u khaw ha kine ki san bnai sha ki paidbah kiba dei ban ïoh bad na ka liang ka EC ka la ai por haduh ka 14 tarik Nailar, 2024 ban sam lut sha baroh kiba dei hok ban ïoh hynrei um shym la lah ban leh ïa kata.
Na ka liang u Bah Khongphai u la ïathuh ba ka shnong ka la pynkhreh ban ujor da ka ejahar pyrshah ïa u Bah Kharlukhi halor kane ka bynta.
Shuh shuh u Rangbah Shnong u la ïathuh ba katkum ka RTI kaba ki la ïoh, ka paw shai ba u FPS Dealer u la dep ban kit ïa u khaw na ka bynta san bnai napoh FCI Godown.
