Shillong, Nailar 19
Ka jingpynïasoh jong ki lai ngut ki MLA ka Congress sha ka National People’s Party (NPP) ha ka Lah Sngi U Blei ka la pynlong ïa kane ka seng kaba synshar ïa ka jylla ba kan kiew sha ka 31 ngut ha ka jingdon ki MLA hapoh ka Ïingdorbar Thawaiñ kaba don 60 ngut ki dkhot.
Ha kane ka jylla, kano-kano ka seng saiñpyrthei ne ka kynhun synrop jong ki seng saiñpyrthei ka donkam ym duna ïa 31 ngut ki MLA ban thaw sorkar.
Ka sien bakhatduh ba ka jylla ka la sakhi ïa kano-kano ka seng saiñpyrthei kaba don palat 31 ngut ki MLA tang nalade ka dei ha u snem 1972. Ha ka ilekshon sha ka Ïingdorbar Thawaiñ ha u snem 1972, ka seng All Party Hill Leaders’ Conference (APHLC) ka la jop haduh 32 ngut ki MLA tang marwei. Ki konstitwensi ha kato ka por ruh ki la don 60 tylli.
Kane ka dei ka sien banyngkong bad kaba khlem lah shuh ban urlong biang ha ki ilekshon kiba bud hadien u snem 1972, kata, ha ki ilekshon ba la long ha u snem 1978, 1983, 1988, 1993, 1998, 2003, 2008, 2013, 2018 bad 2023.
Ha kane ka khep kaba mynta, watla ka NPP ka khlem lah ban jop palat 31 ngut ki MLA ha ka ilekshon kaba la long ha u snem 2023, hynrei ka la ïoh pat ban tan ïa san ngut ki MLA na kiwei ki seng saiñpyrthei ha kine ki shi snem tam ban pynlong ïa ka ban poi shaduh 31 ngut ki MLA. Kine ki san ngut ki kynthup ïa arngut na ka People’s Democratic Front (PDF) bad lai na ka Congress.
Lada ym don shuh ka jingkylla, ka NPP bad u Conrad K Sangma ki la suk ban synshar haduh ba kut jong ka samoi treikam ha u snem 2028.
