Shillong, Nailar 19
Ka jingbun paid tang jong ka National People’s Party (NPP) mynta ka la kiew sha ka 31 ngut ki MLA bad kane ka la wan hadien ba lai ngut ki MLA ka Congress ki la pynïasoh pura noh ïalade sha ka NPP.
Ïa kine ki lai ngut ki MLA ka Congress la pdiang sngewbha sha ka ïing NPP da u National President ka seng, u Conrad K Sangma, uba long ruh u Myntri Rangbah ka jylla, ryngkat ka jingdon lang ki ar ngut ki Symbud Myntri Rangbah nalor ki MLA bad ki MDC ka NPP lem bad kiwei kiwei ki nongïalam ka seng ha ka jingïalang ba la pynlong ha shlem treikam bathymmai ka NPP ha ka Lah Sngi U Blei.
Kine ki lai ngut ki MLA Congress kiba la pynïasoh sha ka NPP ki long u Bah Charles Marngar na Mawhati konstitwensi, u Dr Celestine Lyngdoh na Umsning konstitwensi, bad u Bah Gabriel Wahlang na Nongstoiñ konstitwensi.
Lah ban kdew ba hadien ka jingher ka khubor ba ki lai ngut ki MLA kin leit ban pynïasoh noh sha ka NPP, na ka liang ka Meghalaya Pradesh Congress Committee ha ka 16 tarik Nailar, ka la pyntip sha u Bah Charles Marngar bad Bah Gabriel Wahlang ba namar ka jingleh pyrshah seng, la sospon noh ïa ki haduh 6 snem na ka Congress. Hynrei kaba kum kane ka jingtip ka khlem don na ka bynta u Dr Celestine Lyngdoh.
Lyngba ka jingpynïasoh pura jong kine ki lai ngut ki MLA, ka NPP mynta ka la kiew sha ka jingdon 31 ngut ki MLA bad kaba la biang pura ïa ka ban synshar marwei ïa ka jylla khlem da donkam shuh ïa kiwei ki seng saiñpyrthei. Haba kano-kano ka seng ka ïoh 31 ngut MLA tang marwei, la ju ong ruh ba ka la ïoh ïa u ‘Magic Number’.
Lah ban pynkynmaw ba ka NPP ha ka ilekshon MLA ha u 2023, ka la jop 26 ngut ki MLA bad ka la duna sa 5 ngut ban ïoh synshar marwei bad lyngba ka jingïatreilang bad ka BJP, UDP, HSPDP bad PDF ka la ïoh ban thaw ïa ka Sorkar MDA-II.
Hynrei tang hadien katto katne bnai, ki ar ngut ki MLA ka PDF ki la mih noh na ka seng ban leit pynïasoh pura sha ka NPP, kaba la kyntiew ïa ka jingdon ki MLA ka NPP sha ka 28 ngut bad mynta ka kynti da ka jingpynïasoh sa ki lai ngut ki MLA ka Congress, ka jingdon ki MLA jong ka NPP ka la long 31 ngut ba kynthup ïa u Lamphang bad u Symbud Lamphang ka Dorbar Thawaiñ. Hadien ba ka NPP mynta ka la don haduh 31 ngut ki MLA, kaba la biang pura ïa ka ban synshar marwei ha ka Sorkar, ka jingkylli kaba mih mynta ka long kaei ka ban jia ïa kiwei pat ki seng saiñpyrthei kiba ïatreilang hapoh ka MDA-II, bad watla kin dang neh hapoh ka sorkar hato ka shuki Myntri ba bat da ki MLA ka UDP, HSPDP bad BJP kan dang neh bad ki ne ka NPP kan shim hi noh shalade?
