Shillong, Nailar 19
Ka Khun Hynñiewtrep National Awakening Movement (KHNAM) ka la ban jur ba ka ïingdorbar thawaiñ ha kane ka kynti ka dei ban wanrah ïa ka rai kaba mynjur lang (resolution) ban pynduh noh ïa ka ‘Personal Interview’ na bynta ki kam ha ka thup Group ‘B’, ‘C’ bad ‘D’ ha ki tnad treikam bapher-bapher jong ka Sorkar.
Ïa kane la pynsngew da u Working President ka KHNAM, Bah Thomas Passah ha ka Lah Sngi U Blei ha ka jingïakhih shong kyllaiñ mungor ba la pynlong da ka seng ha Madan Malki.
“Kane ka long kum shi bynta ban pynsngew sha ka Sorkar halor ka jingdawa jong ngi kaba ngi la buh hakhmat jong ka la shi snem tam ban pynduh noh ïa ka ‘Personal Interview’,” ong u Bah Passah haba kren sha ki lad pathai khubor.
U la ong ruh ba ki la don bun tylli ki jingthoh kiba ka seng ka la pynpoi sha ka Sorkar naduh u snem ba la dep haba ïadei bad katei ka bynta.
“Ka jingpynpaw jong ngi ka long tang kawei – kumba la leh lang da ka Sorkar India ha u snem 2016, kumba la leh lang da 23 tylli ki Jylla hapoh ka Ri ban pynduh noh ïa ka ‘Personal Interview’ bad ba ka jingthung kam ha ki tnad Sorkar bapher-bapher kan long kaba khuid ba suba khlem da donkam ban leit wad ïa kita ki long-heh long-haiñ khnang ba ki samla jong ngi kiba dei hok ban ïoh kam Sorkar, kin ïoh,” u la ong.
U Bah Passah u la ong ba ka seng ka la ai jingmut ïa ka Sorkar ban khmih beit thik tang na ka ‘Written Examination’ haba ka rai ban ai kam ïa uno-uno u kyrtong ba shah jied na bynta kata ka kam.
“Kane kam dei kaba kut bad nangne shakhmat ngin dang buh shuh ki prokram bad ngin dang ïai kren ïa kane ka bynta haduh ba ka Sorkar kan shah skhor, kan sngewthuh ïa kane ka jingdonkam bad kan weng noh ïa ka ‘Personal Interview’ haba thung ïa ki kam ha ka Group ‘B’, ‘C’ bad ‘D’ jong ki kam Sorkar bapher-bapher,” u la ong.
Haba kren halor ka Dorbar Synrai ban wan, u Bah Passah u la ong ba ka seng ka kwah ba ki nongmihkhmat kiba kren na ka por sha ka por ba ki angnud ïa kata kam jingkhuid jingsuba bad kiba pynpaw ka jingsngewkhia ïa ka lawei ki khun samla ban kren ïa kane ka mat hapoh ïingdorbar.
“Ngi kwah ban peit pat la ki nud ne em ban kren ïa kane ka mat hapoh ïingdorbar. Ka jingkwah jong ngi ha kane ka dorbar ban wan mynta – ka dei ban wanrah ïa ka rai kaba mynjur lang (resolution) lyngba ka ïingdorbar ban pynduh noh ïa ka ‘Personal Interview’,” u la ong.
“Ngim lah ban len halor kiba bun bah ki jingthung kam tuh ha ki tnad treikam bapher-bapher ha kaba wat ki nongmihkhmat jong ngi ruh ki don bynta ban myntoi ha ka jingïoh ‘vote’ ha ka ilekshon,” ong u Working President.
Shuh shuh u la ban biang ba ki nongmihkhmat ki dei ban sngewthuh ïa katei ka bynta kumjuh ban pyndep la ka kamram da kaba kren ban wanrah ïa ka rai kaba mynur lang ban pynduh noh ïa ka ‘Personal Interview’.
