Shillong, Nailar 19
U President ka NPP Meghalaya State Unit u Bah Prestone Tynsong uba long ruh u Symbud Myntri Rangbah ka jylla u la ong ba ka jingkhang jong ka NPP ka long kaba plie na ka bynta kiwei kiwei ki seng saiñ pyrthei ba kin wan pynïasoh.
“Ka jingkhang jong ka NPP ka plie beit na ka bynta kiwei kiwei ki seng saiñ pyrthei bad ki lah ban wan ha kano kano ka por ruh ban pynïasoh pura noh bad ngi,” la ong u Bah Prestone haba kren ha ka jingïalang pdïang ïa ki 3 ngut ki MLA sha ka sem jong ka NPP.
U Bah Prestone u la ong, ka 19 tarik Nailar kan dei ka sngi sah jingkynmaw ïa ka NPP namar ba um shym la poi pyrkhat ba ha kane ka sngi, ka NPP kan ïoh ïa u ‘magic number’ ne ban kiew ka jingbun paid sha ki 31 ngut ki MLA. “Ngi dap da ka jingkmen kaba khraw, naba nga khlem khmih lynti ba kane ka kynti ba mynta kan dei ruh ka sngi ba ngin ïoh ïa u Magic Number,” u la ong.
“Watla ha ka ilekshon MP kaba dang shu dep, phi la ïohi ïa ka jinglong jingman, bad ki briew ki la kren shibun kiei kiei ïa ka NPP, hynrei U Blei pat u don la ka jong ka plan ïa ka NPP, naba wat hapdeng bun ki jingïaleh, mynta ngi la lah ban jam ïa ka jingkieng,” la ong une u nongïalam NPP.
U Bah Prestone u la ong, lyngba ki kam kiba ka NPP ka la trei ha baroh kine ki snem, ki la pynkylla ïa ka jingmut jingpyrkhat jong ki paidbah bad ka jingwan jong kine ki 3 ngut ki MLA ban pynïasoh sha ka NPP ruh kam dei satïa halor kino kino ki jingshah pynbiej.
U la ong ruh ba kane kam dei ka jaka ban ïaleh drama, kane ka dei ka jaka jong ka ïing NPP ban shakri ïa ka jylla, khlem da peit ne leh shiliang ïano ïano ruh.
