Mawkyrwat, Nailar 19
Uwei u briew u la duh ei noh ïa la ka jingim katba uwei pat u la mynsaw ha ka jingïatyngkhuh kali kaba la jïa ha ka surok Bamon hajan ka shnong Nongnah South West Khasi Hills District.
Katkum ki tyllong khubor na ki pulit la ïathuh ba katei ka jingjia ïatyngkhuh kali ka la jïa ha ka janmiet jong ka 18 tarik mynta u bnai, kaba dei ka sngi U Blei ha por kumba 4:30 haduh ka 5:00 hapdeng ka Scooty kaba don ïa u nombor ML12-1979 bad ka Mahindra Marazzo kaba don ïa u number AS03-AA-3177 bad ha katei ka jingjia u nongñïah jong ka Scooty uba tip kyrteng kum u Balsan Arengh, 35 snem ka rta na ka shnong Chiring u la duh ei ïa la ka jingim katba uba shong hadien u Bah Happyrose Thongni, 49 snem u la mynsaw.
Ki tyllong khubor ki la ïathuh ruh ba u Balsan Arengh uba dei u nongñïah jong ka Scooty u la khlad na ka jingmynsaw ha lynti ha ka por ba la pynkit ïa u sha Civil Hospital Mawkyrwat.
Ïa u nongñïah jong katei jong ka Mahindra Marazzo uba na Assam ïa uba la tip kyrteng kum u Motiur Rahman, la kem noh da ki pulit jong ka Ranikor bad ban kurup noh ruh ïa ka kali hadien ba ka la don ka jingujor ejahar pyrshah ïa u.
