Shillong, Risaw 26
Ki nongïalam saiñpyrthei ba rangbah na rilum Jaiñtia, u Dr. Wanweiroy Kharlukhi bad u Bah Vincent H. Pala, ha ka lah sngi U Blei ki la pynpaw ïa ka jingsngewkhia halor ka jingbym pat lah ban pynbeit ïa ka kam tih dewïong, da kaba kynnoh ba ka jingkhang tih dewïong ka la pynduh ïa ka hok jong ki paidbah ban kamai jakpoh, katba ki jingkular jong ka BJP ki dang sah tang ha ki ktien.
U Dr. Kharlukhi, uba la long teng u President ka National People’s Party (NPP) ha Meghalaya, u la ong ba ka kam tih dewïong ka long kaba kongsan ïa u namar ba u dei na Jaiñtia, bad u la ju rah ruh ïa kane ka mat hapoh Parliament.
“Ka jingkamai jakpoh ka dei kawei na ki hok ba kongsan jong ngi. Haba ki khang ïa ka kam tih dewïong ha ka distrik jong nga, nga sngew ba ki la knieh ïa ka hok jong ki paidbah ka Jaiñtia Hills ban kamai jakpoh,” u la ong.
Halor ka jingpynthikna jong ka BJP ïa ki 8 ngut ki MLA ba yn sa pynbeit ïa ka kam tih dewïong watla kam shym la lah ban pyndep ïa ka jingkular jong ka ha u snem 2018 ban pynbeit hapoh 180 sngi, u la ong, “Kane ka dei ka NGT, kumta, ngam tip ïa ki jingkular jong ka Sorkar bad ka ïingbishar. Lada don ka jingïapher hapdeng ka Sorkar bad ka ïingbishar, ngam tip kumno yn pynbeit ïa kata. Hynrei uno-uno ruh u lah ban kular. To ngin peit ïa ka jingmih,” u la ong.
Haba kren halor ka jingthmu jong ka Sorkar ban pynïaid biang ïa ka kam tih dewïong katkum ki rukom kiba ïahap bad ki kyndon saian, u Dr. Kharlukhi u la ong ba un sngewkmen lada ka Sorkar ka lah ban pynim biang ïa kane ka kam ha Jaiñtia Hills.
“Ngam tip ïa ka jinglong jong ki sienjam ba la shim, phi lah ban kylli ïa u Myntri Rangbah. Hynrei nga sngewkmen shisha lada ki lah ban pynïaid biang ïa ka kam tih dewïong ha Jaiñtia Hills. Ha kajuh ka por, dei ban kylli ïa ki paidbah Jaiñtia baroh, hato ki sngewkmen ne em ïa ka rukom kaba ka Sorkar ka ïaid halor kane ka kam,” u la ong.
Haba pynpaw ïa kajuh ka jingsngewkhia, u President ka Meghalaya Pradesh Congress Committee, u Bah Vincent H. Pala, u la ong ba ka jingeh halor ka kam tih dewïong kam dei tang jong ka Khasi bad Jaiñtia Hills, hynrei ka ktah ïa ka jylla Meghalaya baroh kawei, kynthup ïa ka Garo Hills.
“Nga shu kwah ban bynrap ïa kaei kaba u Dr. Kharlukhi u la kren ba ma nga bad ma u ngi la ïakynduh ïa ki Myntri ban ïakren halor kane ka kam, hynrei kam shym la don kano-kano ka jingmih kaba seisoh,” u la ong.
“Ha u snem 2018, ka BJP kala kular ha ka manifesto jong ka ba kan pynkylla ïa ka aiñ hapoh 180 sngi, hynrei kam shym la leh ïa kata. Kumta, nga hi ngam don shuh ka jingkyrmen ïa ki jingkular jong ka BJP. Nga thikna ba ki jingkular kila pynngop ïa ki briew ban rung sha ka BJP kin sah tang kum ki jingkular,” u la ong.
U Bah Pala u la kdew ruh ïa ki nongïalam bad ki paralok jong u Justine Dkhar kiba la rung sha ka BJP ha ki por ba la leit, da kaba ong ba watla ki la don bun ki jingkular, ym shym la urlong satia.
U la pynpaw ïa ka jingsngewskhem ba ka jingrung jong ki MLA sha ka BJP mynta ka kynti ruh kan ym wanrah ïa ka jingmih kaba thymmai, da kaba kynnoh ba bun na ki, ki la rung sha ka party namar ka jingbym hun ïa ka rukom treikam jong ka Sorkar MDA bad ka jingïapher jingmut hapdeng ki paralok Sorkar.
U Bah Pala u la kdew ba ki katto katne ki nongïalam ki la pynksan ïa ka rai jong ki ban rung sha ka BJP da kaba ong ba ka khambha ban ïap kum u khla ban ïa kaba ïap kum ka miaw.
“Hynrei lada phi peit ïa ki jingkren jong ki, ki pynshong nongrim ha ka jingkyrmen. Teng teng ki jingkyrmen bad ki jingphohsniew ki urlong, hynrei teng teng kim urlong,” u la ong.
