Shillong, Risaw 26
U MP barim ka Rajya Sabha, uba dei u nongïalam barim ka NPP, u Dr. Wanweiroy R. Kharlukhi u la ong ba um pat ju leit wat tang shisien ha ka jingïalang ki seng saiñpyrthei kiba don ha ka Sorkar National Democratic Alliance ba la ïalam da ka BJP hadien ba u la sngewthuh ba ka jingïatreilang kam shym la seisoh eiei.
Haba pynkynmaw ïa ka por jong u kum u MP Rajya Sabha bad ïa ka MP Lok Sabha barim jong ka Tura ka Agatha Sangma, u la ong ba watla u la rah ïa ki mat kum ka jingthung Vice Chancellor ka NEHU hynrei kam shym la don eiei kaba ki leh.
“Ngam lah ban klet ïa ka kam VC ha NEHU, ha kata ka por ka Agatha ka don ha Lok Sabha, nga don ha Rajya Sabha, ngi la ai da ka jingthoh, hynrei ynda ngi la ïakynduh ïa u Myntri ka Sorkar Pdeng uba peit ïa ka tnad pule u la kular ban leh hynrei um shym leh satia” u la ong.
“Hangta nga sngew-thuh ba kam long kaba lah namar kata ngam ju leit shuh sha ki jingïalang jong ka NDA namar ïa kaei kaba ngi wanrah, kim sngap,” la ong u Dr. Kharlukhi.
U la kyntait ban kren eiei halor ka jingïadei jong ka NPP bad ka BJP. “Ngam lah ban ai jingmut namar ngam don shuh bad ka NPP, ka dei ka kamram jong ki ban ai jingmut,” u la ong.
Haba ai jingkheiñ ïa ka jingtreikam jong ka MDA, u la ong ba ki paidbah ki la dep ban ai jingkheiñ ïa ka. “Ngi la don arsien ka ilekshon sha ka ïingdorbar thawaiñ, kumta ka jingmih ka la biang,” u la ong.
Halor ka jingkiew jong ka BJP na ka 2 ngut ki MLA sha ka 10 ngut, u Dr. Kharlukhi u la ong ba ka jingtynjuh jong ka kan long ha u snem 2028.
“Shwa u snem 2023, la ju kylli ïa kajuh ka jingkylli shaphang ka TMC, haba ki 12 ngut ki MLA ki la mih na ka Congress ban rung sha ka TMC, nga la ong ba ka seng ka dang sah ban shah bishar ha ki paidbah, to ngin sa peit ha u snem 2023 bad ngi la ïohi ïa ka jingmih. Kumjuh ruh ki paidbah kin sa bishar ïa ka BJP ha u snem 2028, ” u la ong.
