Nongstoiñ, Risaw 26
Ka Seng Longkmie jong ka shnong New Nongstoiñ ha ka sngi Nyngkong ka la pynlong ïa ka prokram ban pynsngewthuh paidbah ïa ka jingkhuid jingsuba ha ka jingïalang kaba la long hapoh ka Hall jong ka Market Complex, New Nongstoiñ.
Kane ka prokram, ka long ruh shi bynta ban rakhe ïa ka Jubili Ksiar jong ka West Khasi Hills District.
Ha kane ka jingïalang ka Deputy Commissioner jong ka West Khasi Hills District ka Hema Nayak, IAS kala long kum ka kongsan ha ryngkat ka jingïadonlang u Bah S. Rashir, Rangbah Shnong ka New Nongstoiñ uba long ruh u MDC ka Mawshynrut Konstitwensi, u Bah M. Thongni, Kong A. Kharsyntiew, Secretary jong ka Seng Longkmie, ki riew rangbah ka shnong bad kiwei-kiwei.
U Bah S. Rashir u la ong ba ka jingdap 50 snem jong ka WKHD ka dei ka jingtrei shitom bad jinglen lade jong ki riew rangbah kiba naduh ki por kiba mynshwa khamtam ki nongmihkhmat kiba kynthup ïa u Bah Raisen Mawsor (bam kwai ha dwar U Blei) bad u Bah Mawlot kiba trei borbah tad haduh ban da ïoh ïa ka District bad “ka shong sa ha ngi mynta kaei kaba ngin leh na ka bynta ki longdien.”
Ka Hema Nayak, IAS, Deputy Commissioner ka West Khasi Hills haba ai jingkren kala ban jur halor ka jingdonkam ban leh khuid, leh suba bad ban pynneh pynsah ïa ka sor kaba khuid bad kaba itynnad.
Ka la ong ba watla la pynlong bun ki prokram kiba itynnad kum shi bynta ban rakhe ïa ka Jubili Ksiar jong ka District, hynrei ki jingthmu kiba kyntiew ïa ka jingkhuid jingsuba ki long kiba kongsan khamtam eh na ka bynta ka imlang sahlang.
Ka Deputy Commissioner kala ïaroh ruh ïa ka jingtrei shitom jong ka Seng Longkmie ryngkat ka jingkyrshan jong ka Dorbar Shnong, kaba la shim ïa kane ka sienjam ban noh synñiang sha ka jingrakhe ïa ka Golden Jubilee lyngba ka prokram ka ban ai jingmyntoi ïa ka imlang sahlang da kaba shim hi ïa ka jingkitkhlieh ha ka lut ka sep.
Ka la pynpaw ruh ïa ka jingdonkam ban buh ïa ki jaka bret jaboh bad kala ïawer bad kyntu ïa baroh naduh ki shnong, ki skul, ki hospital bad khamtam ki paidbah ban ai ka jingïatreilang na ka bynta ban wanrah ïa ka khuid ka suba da kaba ka la pynpaw ruh ba kiba bun ki briew na shabar ka Jylla ki tang shu ïoh sngew ba dei na Meghalaya kin ong ba ka dei ka Jylla kaba khuid tam hapoh ka Ri khamtam ka East Khasi Hills ka ju ïoh ïa kata ka nam. Hynrei ka la kdew, ban pynneh pynsah ïa kane ka nam ka shong ha ka jingshimkhia jong uwei pa uwei shimet-shimet.
Nangta, ha kane ka prokram na ka liang ka DC kala ïoh ruh ban khap ïa u ribon kum ka dak ban pyllait paidbah ïa ki jaka bret bad pynlang ñuit ïa kaba Seng Longkmie kan sa leit buh ha kylleng ki jaka jong ka shnong.
Ha kane ka prokram la wan ban ïashimbynta da ki nongmihkhmat jong ka New Nongstoiñ Sports, Social and Cultural Club bad ka Seng ki trai bad nongñiah taksi jong ka thaiñ Nongstoiñ, bad la pynphuh pynphieng shuh-shuh ïa kane ka jingïalang da ki jingrwai bad ki drama lyngkot kiba pynpaw ïa ka jingkordor jong ka jingkhuid jingsuba, ba la ai da ki dkhot ka VDP New Nongstoiñ, bad na ka Thwei Baïar CLF.
