Shillong, Risaw 26
U Nongïalam ka Congress Bah Vincent H Pala ha ka sngi Nyngkong u la shim ba u Myntri barim ka Jylla u Bah Paul Lyngdoh kum u ‘Sing ba la mynsaw’ (wounded lion) hadien ka jingkynthih noh ka jong u, na ka United Democratic Party (UDP) sha ka National People’s Party (NPP), bad ong ruh ba ki MLA kiba rung sha ka BJP ki la leh tang ha ka jingphoh sniew naba ka BJP kam shym la bat ïa ka kular.
Halor ka jingphet seng ba dang shen jong ki 11 ngut ki MLA ka UDP, kata 8 ngut sha ka BJP bad 3 ngut sha ka NPP, u Bah Pala u la ong, “Kiba bun napdeng jong ki, kila leit ïasoh sha ka BJP namar ka jingphohsniew bad jingkyrmen kumba nga ong ha phi hynrei nga la ïohi ha ka BJP ba kim ju bat satia ïa la ka kular bad ki jingkyrmen. Nga thikna ba hapoh u 2028 ki paidbah kin ai ïa kata ka jingkyrmen sha ki MLA”.
U Bah Pala u ong, “3 ngut na ki, kila ïasoh sha ka NPP bad phi ïatip bha ba na kine ki lai ngut, u Bah Paul u dei uba la bat teng ïa ka shuki Myntri bad nga ju ong ba u Bah Paul u dei u ‘Sing ba la mynsaw’ kata hadien ba u la shah siat ha la ka jong ka party haba sdang da u khnam bad ryntieh bad hadien kata u la pynïasoh sha ka UDP hapoh ka bom bad u la treikam bha hynrei sa shisien u la shah siat bad u la dei u ‘sing ba mynsaw’, kumta to ngin ïa peit kumno une u sing un leh ha ka NPP. Nga khmih lynti ba un treikam bha, un long Myntri ne em, ïa kata ngin sa ïohi”.
Shuh shuh u Bah Pala u la ong, “Hynrei lada ki jingkular kim don hangta, nga tharai kin sa ïaid ha kajuh ka lynti kumba nga ong ïa ki MLA ka TMC kiba la leit ïasoh da ka jingkyrmen kaba heh hynrei haba kut, ym don uwei ruh u ban wanphai pat lait noh tang uwei lane arngut, kajuh kan sa jia ïa ki MLA ka UDP”.
