Shillong, Risaw 26
Ka Shillong Sohra Tourist Taxi Owners and Drivers Association (SSTTO&DA) ka pynpaw ka jingsngewkhia haba ïadei ka jingbym shimkhia ka Shillong Municipal Board (SMB) haba ïadei ka jingphah jingthoh ka kynhun ha ki por ba la dep halor ka jingdonkam bording ban pynshai ïa ka jaka pynïeng kali kaba don ha MUDA ïew Mawlong, Shillong.
Ha ka 26 tarik u Risaw 2026 ka SSTTO&DA ka la pyntip ba ka la phah shithi biang sha u Chief Executive Officer (CEO) jong ka SMB ban pynkynmaw biang ïa kane ka jingdonkam ba la donkam kyrkieh na ka bynta ban pynsuk ïa ki paidbah.
Na ka liang u Bah Shanlang Diengdoh Secretary ka SSTTO&DA u la pyntip ba ka kynhun ha kane ka kynti ka buh ka jingkyrpad jur ïa ka ophis ka SMB ban shimkhia mardor ïa kine ki jingeh kiba la mad da ki paidbah nongleit nongwan ha ka por mynmiet.
Shuh-shuh u la ong, kumba ka long mynta kane ka jaka ïeng kali kiba leit sha Sohra, Shella bad Mawkyrwat ka dum tliw-tliw bad kam long kaba shngaiñ ïa ki kynthei ki khynnah kiba dei ban leit ban wan lyngba katei ka jaka ïeng kali, kumta u la pynpaw ba ka bording ban ai jingshai ka long kaba donkam bha ban ïoh noh mardor ha katei ka bynta, khnang ba yn lah ban weng noh ïa kine ki jingeh ba ki paidbah ki la hap ban mad baroh shi katta.
U la ïathuh ruh ba ka kynhun haba ïadei kane ka bynta ki la phah jingthoh ruh sha ki lai ngut ki nongmih khmat paidbah sha ïingdorbar thawaiñ ka Jylla, kynthup ïa u MLA ka Shella, MLA ka Sohra, bad MLA ka Mawkyrwat ba kin shimkhia haba ïadei kane ka bynta.
Sa shisien ka kynhun ka kyntu jur ïa ka ophis u CEO jong ka SMB ban shimkhia lem ïa kane ka jingpynsngew jong ka kynhun bad ban leh noh kham kloi na ka bynta ka bit ka biang jong ki paidbah nongleit nongwan.
