Shillong, Risaw 26
Ka Khasi Students’ Union (KSU) ha ka lah Sngi U Blei ka la maham ban shim da ki sienjam kiba kham tyngeh lada ka Sorkar kam lah ban pynurlong shisha kumba ka la kular halor ki san tylli ki mat jingdawa kiba dang sahteng.
Haba kren sha ki nongthoh khubor, u Samla Raymond Khar-jana President KSU, u la ong ba ki mat ba la ïakren ha ka jingïakynduh ïa u Myntri Rangbah ka Jylla u Conrad K Sangma ka long ban pynduh pyndam ïa ka Public Hearing jong ka Shree Cement Ltd, ban bud ryntih ïa ka 80:20 ha ka jingthungkam nos ha NEIGRIHMS, ka jingpyntreikam ïa ka Megha -laya Residents Safety and Security Act (MRSSA), ka mat thungkam thungjam hapoh MPSC & DSC bad ka jingpyntreikam ïa ka Migrant Workmen Act.
U la ong ba kumba long mynta, katto katne na kine ki mat ba ka KSU ka shimkhia ki la sdang ban wandur, hynrei ki don pat kiwei kiba dang donkam ban buddien ban ïakren ïathir kham bha bad kane ka long kum shibynta ka jingbuddien jong ka seng.
Halor ka mat ka MRSSA, u Samla Raymond u la ong ba na ka liang ka Sorkar ka pyntip ba kane ka dang don ha ka bynta ba pyndonkam ha kaba na ka liang ka KSU ka la pynsngew ba ka dei ban ïohi ïa ka Final DPR jong ka projek khnang ban sngewthuh ïa ka jingïaid jong ka kam bad ka la poi ha kano ka bynta.
Haba ïadei ka NEIGRIHMS, u Samla Raymond u la ong ba ka seng ka la ïakren la jan shisnem tam bad mynta ka kynti ka la ïoh ïa ka jingkular na u Myntri Rangbah ba ha kine ki khyndiat sngi ka KSU kan ïoh ban ïakynduh ïa u Union Health Minister ban pynsngew halor kine ki jingeh bad ki daw ba ka seng ka pyrshah, nalor kane u Myntri Rangbah u la kular ba un sa pynsngew ïa kine ki jingsngewkhia ha ka jingïalang ka Governing Body jong ka NEIGRIHMS ka ban long mynta ka 27 tarik u Risaw 2026.
Shuh-shuh u la ïathuh ruh ba ka KSU ka la buh jingkylli ruh ïa ka Fact Finding Committee kaba la pynlong ïa ka Hearing ha Shillong, “Ka jingpynlong ïa ka Hearing sha ki jaka kaba jngai na kaba jia, ka lah ban pynduh mynsiem ïa ki nongwan, namar ka jingbun ka jinglut kum ka bai kali bad ka bai bam bad kumta ter-ter,” u la ong bad bynrap ba ka KSU ka la pynsngew ïa ka Sorkar ba ka Committee ka dei ban hiar pynlong Hearing ha ka jaka ba jia ki jingjia khnang ban lah ban sngewthuh khambha ïa ka jinglong jingman jong kane ka mat.
Haba ïadei ka Migrant Workmen Act, u Samla Raymond u la ong ba kane ka bynta ka la sdang ban urlong, hynrei u la kynnoh pat ba haduh mynta kam pat don ka jingpynmih ïa ki kyndon ban pyntreikam. U la ïathuh ba ïa kane ka bynta na ka liang ka Sorkar ka la kular ban leh ban pynmih noh shen ïa ki kyndon jong kane ka Act.
Na ka liang u General Secretary ka KSU u Samla Reuben Najiar, u la ong ba ka Sorkar ka la kular ban pynduh noh ïa ka Personal Interview ha ki jingthungkam Grade-D naduh ka 01 tarik Kyllalyngkot 2027, hynrei ki dang don pat ki mat kiba la pynsngew haba ïadei ban pynkhuid ïa ka jingthungkam, kum ban pynlait ïa ki mark jong ki khynnah kiba ïaleh ïa ki eksam bad kiwei-kiwei kiba la phah ha ki jingai jingmut.
U la ïathuh ba haba ïadei kine ki jingai jingmut na ka liang jong ka Sorkar ka la pdiang, hynrei ka dang pynkhreh ïa ki SOP ban pynmih ïa ki kyndon ha kine ki khyndiat sngi ban wan. Ka KSU ka la kyntu ïa ka Sorkar ba ka dei ban pynkhuid bad ban pyntreikam pura ïa ki jingai jingmut khnang ba ka jingthungkam kan long ka ba khuid ba suba nangne shakhmat. Ka KSU ka la pynpaw ba ym lah ban ong ba kane ka jingïakynduh ïa u Myntri Rangbah ka long kaba seisoh ne em, namar kata ka seng ka dang donkam ban ïohi shwa ïa ki sienjam ba ka Sorkar kan pyni, lada ki jingïakren kim don jingmut bad ym don kano-kano ka jingmih ka seng kam banse ban sa shim da kiwei ki sienjam kiba kham tyngeh.
