Shillong, Nailar 19
U samla Phrangki Buam uba dang 23 snem ka rta uba dei u rangïalehkai jong ka Shillong Lajong FC u la pynpaw ba um ju dom lada ki paidbah ki ju pyrta lane ki hylla haba u kum ai bakla ïa ka bol sha u paralok, hynrei u pynleit jingmut beit ïalade ha ka jingïalehkai.
U samla Phrangki u dei shnong trai na Thangbuli kaba hap ha West Jaiñtia Hills bad u la sdang ban ïalehkai phutbol bad ka Shillong Lajong ha u snem 2017. Hynrei ha u snem 2020 u la rung sha ka Bengaluru ha ka Second Division I-League bad ha FC Goa ha u snem 2023.
Namar haba u don ha FC Goa um da ïoh ban ïalehkai bha, kumta ban pyni ïa ka sap, u Phrangki u la wanphai biang sha ka Shillong Lajong ha u snem 2023 bad u la ïoh ban ïalehkai ha kane ka Durand Cup 2024 kaba la long ha Shillong. Kumba ki paidbah ki pyrta ïa ka kyrteng u Phrangki haba u ïalehkai ha madan JN Stadium Polo, U Nongsaiñ hima u la leit ban ïakynduh kyrpang ïa u Phrangki katba u dang kilan met ha madan Polo ha ka Lah Sngi U Blei ban tip ïa ka jingïaid lynti ka jong u bad kumno ka jingpynkhreh haba ka Shillong Lajong kan ïakhun pyrshah ïa ka East Bengal ka kynhun na Kolkata ha ka Quarter-Final ka ban long ha ka 21 tarik Nailar ha ka por 7 baje janmiet ha JN Stadium, Shillong.
Ha ka jingïakren bad u Phrangki u la ïathuh ba ki rangïalehkai ka Shillong Lajong ki la pynkhreh bha ban ïoh rah ïa ka jingjop haba ïalehkai bad ka East Bengal kaba dei ka kynhun kaba don ha ka ISL.
“Ngi la dei ban jop ïa ka FC Goa ha ka jingïalehkai ba dang shu dep, hynrei u ‘rang ap kol ka Goa u la kynjat ïa u rangïalehkai Shillong Lajong haba u ïoh rah marwei ïa ka bol, hynrei wat hadien ba u rang ap kol ka Goa u la shah beh, ngi khlem lah shuh ban thep kol,” u la ong.
Kumta u la kyrpad ba donkam ïa ka jingkyrshan jong ki paidbah ban wan ha madan Polo ha ka 21 tarik Nailar khnang ba ki rangïalehkai kin lehkai bha ban ïoh rung sha ka Semi-Final.
