Jowai, Nailar:
Kum ka dak ban pynsah jingkynmaw ïa ka jingrakhe jong ka jingdap 175 snem ka jinglong Khristan ka Nabon Sawian, ka Kynthei Khristan banyngkong ha Ri Khasi-Jaiñtia ban pdiang ïa U Jisu Khrist kum U Nongpynim jong ka, ka Jingïaseng Kynthei Khasi Jaiñtia Presbyterian Assembly (JKKJPA) ka la pyllait paidbah ïa ka kot ‘Souvenir” ba la thoh shaphang ka jingim bad jinglen lade jong ka Nabon.
Ïa kane ka ‘Souvenir’ la pyllait da u Rev. S.R. Dkhar, Senior Administrative Secretary ka Khasi Jaiñtia Presbyterian Assembly haba pynkut ïa ka jingrakhe kaba la long ha ka Balang Presbyterian Wahiajer, Wahiajer-Moodymmai Presbytery KJP. Synod Mihngi ha ka 17 bad 18 tarik Nailar.
Ka phang pdeng jong kane ka jingrakhe ka long “Ki Kynthei bad ka Mynsiem jingshakri” bad na ka bynta ban sei ïa ki kynthei kiba shitrhem ha ka jingshakri, ka Jingïaseng Kynthei ka la buh ruh ïa ka phang kaba ong “Ka jingshakri ki kynthei ha ka hynnin, mynta bad ka lashai” Loukas 4:18.
Shuwa ka jingpyllait ‘Souvenir’, la sdang da ka jingïaseng ba la ïalam da ka Chairperson jong ka Jingïaseng Kynthei KJP Assembly, ka Kong Sweet Mary Rapthap bad la ïoh ka jingpule bad duwai na ka Kong Pyntngen Talang, ki jingkren pdiang na u Rev. H. Pale.
Ka Kong Apphira Sylliang Secretary Nabon Jubilee Committee ka la ïathuh ba ïa ka jingrakhe dap 175 snem ka jinglong Khristan ka Nabon Sawian, la sdang naduh 19 tarik bad 20 tarik Nailar 2023 ha ka Balang Presbyterian Nongsawlia, Sohra.
Ka la ong ba ha kane ka ‘Souvenir’ ki don ki jingthoh kiba kordor ki ban long ka jingïarap bad jingkyrkhu ïa ki nongpule. Ka la ai khublei kyrpang ïa baroh kiba don bynta ha ki jingthoh namar khlem ka jong ki yn ym lah ban pynmih ïa ka thup sah jingkynmaw.
U Rev. S.R. Dkhar, Senior Administrative Secretary Khasi Jaiñtia Presbyterian Assembly ha ka jingkren u la ai jingïaroh ïa ki longkmie kiba la trei shitom ha ka kam ka jong U Blei bad pynkynmaw ruh ïa ka kyntien kaba batai ïa ka jinglong jong ka kynthei kaba ong, “Ka pyrkhat kum u shynrang, ka leh kum ka kynthei, ka long kum ka khynnah samla bad ka briew kaba don bun ki sap” bad bynrap ba kine ki dei ki jinglong kiba kwah ban ïohi ha ka long rynieng jong ki longkmie.
Hadien ka jingpyllait ‘Souvenir’, la ïoh ka jingrwai Choir na ka Jingïaseng Kynthei Balang Wahiajer. Ha kane ka sngi la donlang u Rev. C.L. Laloo, Moderator, KJP Synod Mihngi, Rev. K. Pariat, Senior Administrative Secretary, Rev. H.L. Khongwir, Moderator KJP Synod Sepngi nalor kiwei-kiwei.
Khyndiat katkum ka ‘Souvenir’, ïa ka Nabon la pynbaptis da u Sahep Missionary, Rev William Lewis ha ka Balang Presbyterian Nongsawlia ha ka 16 tarik Nailar 1848.
Ka Nabon ym tang ba ka dei ka kynthei ka banyngkong ban shah pynbaptis hynrei ka dei ruh ka kynthei ka banyngkong eh ban long ka nonghikai skul.
