Shillong, Nailar 19
Haba pdiang burom ïa ki lai ngut ki MLA ka seng Congress kiba la wan ban pynïasoh bad ka National People’s Party (NPP), u National President ka NPP bad Myntri Rangbah ka jylla, u Conrad K Sangma, ha ka Lah Sngi U Blei u la ong ba kane ka jingwan ki lai ngut kan long ka ban sah kynmaw namar ka jingbun paid jong ka NPP ka la kiew na ka 28 sha ka 31 ngut ki MLA ha ka Ïingdorbar Thawaiñ.
“Nga sngewnguh ïa ka jingshaniah kaba kine ki nongïalam ki la pyni ha ka NPP,” la ong u Conrad.
U la ong ruh ba kine ki MLA ka Congress ki khlem pynïasoh sha ka NPP na ka bynta ban ïoh jingmyntoi ïalade, hynrei ka dei namar ka jingmyntoi jong ka jylla baroh kawei khamtam ha ka liang ka roi ka kiew.
Nalorkata, u la ong ba kitei ki MLA ka Congress ki khlem buh kyndon eiei hashwa ba kin rung sha ka NPP la ka dei ha ka liang ka pisa ne ka bor.
Haba kren sha ki lad pathai khubor bad haba jubab ïa ka jingkylli, u Conrad u la ong ba kan ym pat don ka jingpynkylla ïa ki Myntri ha ka sorkar MDA-II, bad kan bteng kumba ka long mynta.
