Shillong, Nailar 19
Ki nonghikai SSA kiba don hapoh ka shatri jong ka Meghalaya SSA School Association (MSSASA) ha ka Lah Sngi U Blei ka la wan ban pynshai ha kaba ïadei bad ka jingbym ïoh bad shah set tulop jong ki na ka bynta u bnai Naitung mynta u snem.
Haba kren sha ki lad pathai khubor, u Bah Aristotle C. Rymbai, President ka Association u la pyntip ba ha ka 6 tarik u Nailar 2024, na ka liang ka Association ka la leit ban ïakynduh ïa u State Project Director ka SSA, u Swapnil Tembe, bad buh ruh da ka jingthoh ban dawa pyllait noh ïa ka tulop jong ki nonghikai na ka bynta u bnai Naitung. Hynrei u la ong ba la ïoh jingtip pynban ba ka jingslem ban pyllait ïa ka tulop ka dei na ka daw ba ka don ka jingïakhih jong ki nongtrei SSA.
Kum ban shu kdew, ka synjuk ki nongtrei na ki skul bapher-bapher kiba don hapoh ka lama jong ka All Meghalaya SSA Non-Teaching Staff Association(AMSNSA) ha ka 31 tarik u Naitung, 2024, ki la mih paidbah da ki spah ngut ha Madan Malki, Shillong ban pynlong da ka jingïakhih shong kyllaiñ mongor kaba khlem buh por ban dawa na ka Sorkar Jylla ba ka dei ban kyntiew tulop noh ïa ki hadien 8 snem ba ka la neh kumjuh bad ka jingkyntiew tulop ïa ki ka dei ban long beit 80% ym tang 25% kumba la kular da ka Sorkar bad dawa ruh ba ka Sorkar ka dei ban kyntiew tulop 2% ïa ki nongtrei kiba la rangbah bad kiba la neh slem ha ka kam bad 5% ka jingkyntiew tulop kaba manla u snem.
U Bah Rymbai la ong ruh ba ka Sorkar Jylla ka la dep ban mang ïa ka pisa na ka bynta ban siew ïa ka tulop jong ki nonghikai SSA hynrei haduh mynta ka dang shah pynslem sah na ka daw ka jingpynlong jingïakhih jong ki nongtrei SSA.
“Ka long kaei-kaei kaba pynlyngngoh ïa ngi ka Association haba ngi ïoh jingtip ba ïa ka tulop jong ngi la pynslem tang na ka daw ba ka don ka jingïakhih jong kine ki Non-Teaching Staff,” la ong u bah Rymbai.
U Bah Rymbai u la ong ba um kwah ban kynthoh eiei ïa ki nongtrei SSA halor ka jingpynlong jingïakhih jong ki hynrei ka jingïakhih jong ki pat ka la pynduh ïa ka tulop jong ki nonghikai SSA kaba dei na ka bynta u bnai Naitung.
“Hooid, ngi na ka liang ka Association ngim don eiei ban kynthoh ïa ka jingïakhih jong ki Non-Teaching Staff namar ki don ka hok ban ïakhih katkum ka kyndon jong ka riti synshar ka Ri India hynrei kaba pynbynñiaw ïa ngi ka long ba na ka jingïakhih jong ki, ki la pynduh pat ïa ka hok jong ngi ki nonghikai SSA ban ïoh ïa ka tulop jong ngi na ka bynta u bnai Naitung,” u la ong.
Shuh shuh u la ïathuh ba ha ka 14 tarik Nailar 2024, na ka liang u State Project Director u la pyntip sha ka Association ba un sa shim da kiwei pat ki lynti ban pyllait noh ïa ka tulop ba dang sah jong ki nonghikai SSA hapoh kine ki taïew ban sa wan wat lada ka jingïakhih jong ki nongtrei SSA ka dang ïaid shakhmat.
Halor ka jingdon jong kiwei pat ki Association kiba la mih shakhmat bad kam ïalade ba ki dei ki Association jong ki nonghikai SSA kiba la ong ba kim don ka sngewpher ban ïaishah ïa ka tulop wat lada ki shah pynslem ban ïoh da kumba shibnai ne arbnai ruh, na ka liang ki nongïalam ka MSSASA ki ong ba naduh ki snem bad ki por kiba lah dep kim ju shong kli kti ban ïaishah ïa ka jingshah pynslem ka tulop jong ki hynrei na ka por sha ka por, ki la ïai dawa ban ïoh ïa ka hok jong ki.
“Ka MSSASA ka dei kaba la pynrung kyrteng bad ka Sorkar Jylla bad ka Association jong ngi ka don ïa ka jingbthah, ka riti synshar bad ki don kin aiñ kiba khanglad ïa ngi bad kiba ailad ïa ngi ban leh ïa kano-kano ka bynta,” la ong u bah Rymbai.
Shuh shuh u la bynrap ba lada jia ba ka Sorkar Jylla kam pat siew dep ïa ka tulop jong ki, ka Association kan sa shim da kiwei pat ki sienjam.
