Shillong, Nailar 20
U nongïalam ka Congress, u Bah Pynshngaiñ N Syiem, ha ka Sngi Ba-Ar u la ong ba um lah ban pdiang ne sngew ba ka long kaba dei ba u Dr Celestine Lyngdohun wan sha ka jingïalang jong ka Core Committee ka Meghalaya Pradesh Congress Committee (MPCC) ha ka 16 tarik Nailar hadien ba u la dep ban phah shithi sha u Lamphang ka Ïingdorbar Thawaiñ ka jylla ban pynïasoh sha ka National People’s Party (NPP) ha ka 14 tarik Nailar.
Haba kren bad u nongthoh khubor, u Bah PN Syiem uba long ruh u Deputy CEM ka Khasi Hills Autonomous District Council (KHADC) u la ong, “Ngam lah ban kren shai than halor kata ka jingthoh ba la leit ai sha u Lamphang ka Ïingdorbar Thawaiñ ka jylla ban pynïasoh noh sha ka NPP ha ka 14 tarik Nailar, namar ha ka 16 tarik Nailar, u Dr Celestine u la wan ban ïadon lang ha ka jingïalang ka Core Committee jong ka MPCC. Ngam tip la ka dei shisha ne em ba ki ai jingthoh ha ka 14 tarik Nailar, bad lada dei ba ai, kam long ka lynti ba dei ban wan sha ka jingïalang ka MPCC ha ka 16 tarik Nailar.”
Ha kaba ïadei pat bad kiei ki sienjam kiba kum ka Congress kan shim pyrshah ïa ka jingmih noh jong ki lai ngut ki MLA, u Bah Syiem u la ong ba un ym lah ban ong eiei ïa mynta, hynrei ban shong ïapyrkhat kam hapoh ka MPCC bad All India Congress Committee (AICC) kumno ban ïaid shakhmat bad ban ïakren sani shwa bad ki briew ka aiñ la ka donkam ne em ban ïaid da ka lynti jong ka aiñ.
Haba kylli, u Bah Syiem u la ong, “Na ka liang jong nga shimet, ngam don eiei ban ong halor ka jingmih noh jong ki lai ngut na ka Congressnamar nga dang khmih lynti ban ïatreilang ha ka Congress. Hynrei haba ki la mih noh, ka don ka jingsngewdiaw naba ngi la ïa rangbah, bad ngi la ïaid lynti katto katne ha ka saiñ hima sima, bad lehse ka jingmih noh jong ki, ka dei ba ki leh ha ka jingsngewthuh jong ki bad ka jingpyrkhat ka jong ki.”
Haba kylli halor ka rai ban sospon tang ïa ar ngut ki MLA na ki lai ngut kiba leit pynïasoh sha ka NPP, u Bah Syiem u la ong, kane kam shong eh ha ka MPCC, bad ka bor ban rai ka shong ha ka AICC, bad yn nym lah ban ong eiei. Hynrei u la ong ba lehse namar ki ar ngut ki MLA ki khlem wan sha ka jingïalang ha ka 16 tarik Nailar, namarkata, ki la shah sospon.
Haba kylli pat hato kan ktah ne em ïa ka Congress da ka jingmih noh ki lai ngut ki MLA, u Bah Syiem u la ong, ha ka jingshisha ka Congress ka la lah ban leh bha ha ka ilekshon MP ba la dep lada phai ha baroh kawei ka ri, bad ka long tang maka, ka seng kaba lah ban ïakhun pyrshah ïa ka BJP kaba la leh donbor ïa ki rit paid. Hynrei u la ong ba ka jingmih noh ki lai ngut ki MLA ka long kumba theh umpjah. Tangba u la ong ruh ba ka Congress kan nym dait thah naba teng-teng kam shong ha ka jingbun paid bad ka shong ha ka jingskhem nongrim kum ki nongïalam bad ka jingdon ka mynsiem ba shynrang ban ïakhun.
