Shillong Nailar 20
Ka Meghalaya Pradesh Congress Committee (MPCC) ka la lum ïa ka jingïalang jong baroh ki nongkitkam mynta ka taïew ban ïakren halor ka jinglong jingman ka saiñpyrthei hapoh ka seng khamtam ka jingphet jyndat ki lai ngut ki MLA sha ka National People’s Party (NPP).
Ha ka byrta kaba la phah sha ki nongkitkam ka Congress lyngba ka General Secretary in-charge Administration, ka Kong Wansuk Syiem, la ong ba baroh ki nongkitkam ka Pradesh Congress Committee (PCC), MP, MLA, MDC, ex-MLA bad ex-MDC, District Congress Committee (DCC), Block Congress Committee (BCC) bad ki Frontal Organisation kin poi lang sha ka jingïalang ka ban long ha ka 22 tarik Nailar 2024 ha ka por 2 baje nohphai sngi, ym shuh ha ka por 11 baje mynstep kumba la buh por kham hashwa.
Kane ka jinglum ka MPCC ïa ka jingïalang ka dei ruh ha ka por ba ka Congress ka mad ïa ka jingdiaw namar ka jingphet jyndat lai ngut ki MLA kiba la leit ban ïasoh bad ka NPP ha ka 19 tarik Nailar, 2024.
Ki nongïalam ka Congress ki la kubur ba kane ka jingleh ki MLA ka pyndiaw shisha ïa ka seng bad ïa ki paidbah kiba la jied ïa ki ha ka ilekshon MLA namar ki paidbah ki jied ïa ki na ka daw ba ki don ka jingshaniah ïa ka Congress.
Hynrei ki la ong ba kane ka jingdiaw kan dei tang shipor namar ka Congress kan sei da kiwei pat ki nongïalam bad thaw thymmai ïa ki Block Congress Committee ha kito ki konstitwensi kiba la mihkhmat da kine ki lai ngut ki MLA kiba la iehnoh ïa ka seng.
Shuh shuh ki la ong ba ka jingleh ka NPP ban tan ïa ki MLA ka Congress ka dei ka buit ban pyntlot ïa ka seng khamtam hashwa ban poi ka ilekshon shiteng samoi ka ban sa pynlong ha Gambegre konstitwensi kaba dei ka konstitwensi kaba la mihkhmat da u Saleng A Sangma uba la shahjied kum u MP sha ka Ïingdorbar Lok Sabha na Tura konstitwensi.
Uwei na ki nongïalam ka Congress na Rilum Garo u la ong ba kane ka jingleh ka NPP ka long ka jingdiaw ïa ka seng, hynrei kam pynduh mynsiem ban nang trei shitom na ka bynta ka ka ilekshon shiteng samoi ha Gambegre konstitwensi.
“Ka jingphet ki MLA ka Congress sha ka NPP ka paw shai ba ka seng kaba synshar bad ïalam ïa ka Sorkar ka tieng palat ïa ka Congress ha ka ilekshon khamtam hadien ba la ïohi ia kaei kaba mih na ka ilekshon MP ha Rilum Garo,” u la ong.
