Shillong, Nailar 20
U Bah Lahkmen Rymbui uba dei u nongïalam ka UDP bad MLA ka Amlarem u la ong ba ka UDP lada don kino kino ki mat kiba kum ka seng ka hap ban kynthoh ïa ka Sorkar, kan kynthoh beit kumba ka ju leh baroh shi katta.
Haba kren sha ki lad pathai khubor ha ka Sngi Ba-ar, u Bah Rymbui u la ong, “Kum kawei na ki seng kiba ïatreilang ha ka Sorkar synrop, kaei kaba ngi leh bad kren, ka kren briew na ka bynta kito ki paralok ba ïatreilang. Kane kam mut pat ba ka mih jingkylli ka ban teh ban khum ïa ngi. Lada ki don kino kino ki mat kiba ngi kum ka seng ngi hap ban kynthoh ïa ka sorkar, ngin kynthoh beit namar ngi don hangne ban peit ban pynkhlaiñ ïa ka synshar khadar ka jylla.”
Shuh shuh haba kylli, u Bah Rymbui u la ong, “Kaei kaei kaba ktah ïa ka roi ka par, ngin nym shongkli kti hynrei ngin kynthoh beit ïa ka Sorkar watla ngi don lang ha ka sorkar synrop.”
Kane ka jingpynpaw jong u Bah Rymbuika la long shisngi hadien ba ka NPP ka la kot sha u ‘Magic Number’ ne ban don 31 ngut ki MLA nalade kaba la biang pura ba kan synshar marwei, kata hadien ka jingwan pynïasoh pura jong ki lai ngut ki MLA ka Congress ha ka Lah Sngi U Blei.
Kumba ka long mynta, ka UDP kaba don 12 ngut ki MLA, bad ka dei ka seng kaba ïatreilang hapoh ka Sorkar MDA nalor ka HSPDP, BJP ba la lamkhmat da ka NPP.
Haba kylli balei ki MLA ki kham sngewtynnad ban leit rung sha ka NPP wat haba don ka UDP, kaba dei ka seng riewlum kaba heh ha jylla, u Bah Rymbui u la ong, “Katkum ka jingsngew shimet jong nga, ka daw jong ka jingleit rung NPP, ka long ba kum ki seng kiba heh ki don la ka jong ka nongrim. Ngi ki seng riewlum, ki ïohi ba bun tylli ki ilekshon ngi phai khmat tang ha rilum Khasi Jaiñtia, katba ha rilum Garo ngim don, kane imat ka pynlong ïa kiwei ba kin sngew ba ka UDP imat kan nym lah hi ban synshar marwei, ba ki sa leit sha kiwei ki seng.”
U Bah Rymbui uba dei ruh u Myntri barim ka Sorkar u la ong, baroh ki seng saiñpyrthei ki pyrshang ban pynkhlaiñ ïa la ka seng bad ruh ïa ka jingdon ki MLA hapoh ka ïingdorbar Thawaiñ.Kum ka UDP ruh kaba don 12 ngut ki MLA, kan pyrshang ban trei shitom ban pynkhlaiñ ïa ka seng naduh tynrai ha manla ki shnong ki thaw hashwa ban wan ka ilekshon MLA ha u snem 2028.
Shuh shuh u la ong, ha ka kam saiñpyrthei ym long ban shu thiah hynrei ban don ka shkor ban sngap, bad ka UDP nangne shakhmat ka hap ban trei shitom bad ba kum ka seng kam don eiei ban ong ne pynpaw halor ka jingrung NPP jong ki lai ki MLA ka Congress.
