Shillong Nailar 20
Ka All India Congress Committee (AICC) ka dang ïasyllok bad ki stad aiñ hashwa ban mudui pyrshah ïa ki lai ngut ki MLA ka Congress ha Meghalaya kiba la ieh ïa ka seng bad phet noh sha ka National People’s Party (NPP) ha ka 19 tarik Nailar, 2024.
Ka Meghalaya Pradesh Congress Committee (MPCC) ka la sospon ïa ki arngut ki MLA kita, u Bah Gabriel Wahlang bad u Bah Charles Marngar ha ka 16 tarik Nailar, 2024, katba ïa u Dr Celestine Lyngdoh ym shym la sospon satia.
Hynrei ha ka 19 tarik Nailar, 2024, kine ki lai ngut ki MLA ki la leit ïasoh syndon bad ka NPP da kaba kam ba ki la phah jingthoh sha u Lamphang ka Ïingdorbar Thawaiñ ha ka 14 tarik Nailar, 2024, ban ai jingithuh ïa ka jinglong kawei jong ki bad ka NPP.
Haba ïakren bad uwei na ki nongïalam ka AICC, u la ong ba ka AICC ka dang pynkhreh ïa ki jingdonkam ban leit mudui sha Ïingbishar namar ka lynti kam shah ban shu leit mudui sha u Lamphang ka Ïingdorbar Thawaiñ.
Ha ka jingshisha, ka AICC ka kwah ban phah jingthoh sha u Lamphang ka Ïingdorbar ban pyrshah ïa ka jingleit ïasoh ki lai ngut ki MLA bad ka NPP, hynrei ka Congress ka khlem phah jingthoh shuh sha u Lamphang namar u la dep ban ai rai bad ithuh ïa ka jingïalang kawei jong ki bad ka NPP.
Ka Congress mynta ka don MLA sa tang marwei, kata tang u Bah Ronnie V Lyngdoh uba dei u MLA na Mylliem hadien ka jingphet noh jong kitei ki lai ngut ki MLA.
Ka NPP mynta ka la kiew ka jingbunpaid sha ka 31 ngut ki MLA da ka jingleit ïasoh kitei ki lai ngut ki MLA ka Congress.
