Shillong, Nailar 20
Ha kawei ka jingjia, u Saumitra Das Purkayastha, u la ujor ba ha ka step jong ka 17 tarik Nailar, ki runar ki bym lah ban ithuh ki la tuh ïa ki kor CCTV ba la pyndait ha Hanuman Mandir, Hatath Colony Puja Mandap, Kench’s Trace ha kane ka nongbah. Hynrei, ha ka por ba kita ki runar ki dang tuh, la ïoh ban ring dur lyngba kiwei pat ki kor CCTV.
Na ka liang ki pulit ki la ïathuh ba u Nittu Dutta u la ujor ba ha ka 18 tarik Nailar ha ka por kumba 10:15 mynmiet, ki runar ki bym lah ban ithuh ki la shoh la dat ïa u ha Laban bad u la mynsaw.
Ha kawei pat ka jingjia, ka Hoihneikim ka la ujor ba ha ka janmiet jong ka 12 tarik Nailar, ki runar ki la tuh ïa ka ar shaka jong ka (ML-05Q-0902) na Assam Bazar, Them Basuk, Shillong.
Nalorkata, ki pulit ki la ïathuh ba ka Sita Devi Chakma ka la ujor ba ha ka step jong ka 17 tarik Nailar, ki runar ki la tuh ïa ka thuk-thuk jong ka (AS-11Z-6084) na Demthring Block-I, Madanrting, Shillong.
Shuh shuh ki pulit ki la ong ba u Rocky Pebam u la ujor ba ha ka 18 tarik Nailar ha ka por kumba 2:35 mynsngi, arngut ki runar ki la rung sha ka jaka sah jong u ha Lower Lachumiere, Shillong, bad ki la pyrshang ruh ban prong sha ka ïing jong u. Ïa kane ka jingjia baroh la ïoh ban ring dur lyngba ka kor CCTV.
Ha kawei pat ka khubor, ki pulit ki la ong ba ha ka 16 tarik Nailar ha ka por kumba 1:05 mynsngi, u Postal Assistant Post Officer, Post Office Main Branch, Tura, ryngkat bad ki para ba ïatreilang ki la bat ïa uwei u briew ba la tip kyrteng kum u Gatseng Sangma, 32 snem ka rta, halor ka jingkynnoh ba u la leh mynleh kum u nongtrei jong ka Post Officer, bad u la leit lum pisa na ki nongshong shnong na ka bynta ban ai ïa ki Kisan Credit Card. Kham hadien, ki pulit ki la kurup noh 31 tylli ki Kisan Identity Card ba la suba ba ki dei ba la shu shna thok, ki kot ki sla jong ki nongïoh ïa ki Kisan Card, ki kyrteng jong ki nongbat ïa ki Kisan Card ha Selsella bad Demdema Block bad ka pisa T. 3,400.
Nalorkata, ha kawei pat ka jingjia, u Sukumar Mondol, u la ujor ba ha ka 18 tarik Nailar ha ka por kumba 5:30 mynstep, arngut ki runar ki bym lah ban ithuh ki la shoh la dat ïa u ha ïew Tura.
