Shillong, Nailur 09
U Symbud Myntri Rangbah ba dei khmih ruh ïa ka tnad Kam Pohïing (Police) Bah Prestone Tynsong ha ka sngi Balang u la pynthikna ba ka Sorkar Jylla kan sa tuklar lada ym lah ban pynbeit ha ka kyrdan jong ki Chief Secretary ïa ka mat ba la kynnoh ba la pynbor ïa ki trai shnong ha ka thaiñ Langpih jong ka West Khasi Hills ban pynrung kyrteng da ki heh ka Assam ha ka jinglum khana samari.
U Bah Prestone u la kren ïa kane hadien ba u la ïakynduh ïa ka kynhun kaba la pynpaw ïa ka jingkynnoh ba shah lehbeiñ bad shah pynbor pynrung kyrteng ïa ki shnong Khasi kiba sah ha shilynter u pud u sam ba don ka jingïakajia pud hapdeng ki ar jylla.
“Nga la dep ban bthah ïa u Chief Secretary jong ngi ban shimkhia ïa kane ka kam bad u Chief Secretary jong ka Assam, kumba la ju leh. Lada jia ba ki Chief Secretary kim lah ban pynbeit ïa kane ka mat, kumta ngin sa tuklar hi noh ma ngi,” la ong u Bah Prestone.
U la ong ba ïa kane ka kam yn sa nangpynheh suki suki lada donkam.
“Hadien ki Chief Secretary, kawei pat ka kyrdan ïakren kan sa long hapdeng para Myntri Sorkar, bad nangta yn bud pat ha ka kyrdan hapdeng para Myntri Rangbah jong ki ar tylli ki Jylla. Nga la dep ban bthah. Nga sngewthuh ïa ka jingeh ba shisha kaba kum ki briew jong ngi ki ïakynduh ha ka thaiñ Langpih,” u la ong.
Halor ka jingdawa jong ka kynhun ban buh noh ïa ka ktem pulit ba shipor ne ka outpost ban pynthikna ïa ka jingshngaiñ jong ki nongshong shnong, u Bah Prestone u la ong ba ka Sorkar kan sa eksamin ïa kane ka jingtyrwa.
“Ki la pan ïa ka ktem ba shipor ne ka outpost. Ngin sa eksamin ïa kata. Ngi la don lypa ar tylli ki BOP, kawei ha Langpih bad kawei pat kham jngai khyndiat na Langpih. Nga la bthah ïa u Chief Secretary bad DGP ba kin shimkhia ïa kata,” u la bynrap.
