Shillong, Nailur 09
Ka Myntri tnad pla tyngka ka Sorkar Pdeng, ka Nirmala Sitharaman ka la kular ïa ka jingshimkhia na ka liang ka Sorkar India ban pynkloi haba ïadei bad ki Externally Aided Project (EAP) ha ka Thaiñ Shatei Lam Mihngi, hadien ka jingïalang kaba la long bad ki Myntri Rangbah ka Meghalaya bad Assam.
U Myntri Rangbah ka Meghalaya, u Conrad K. Sangma bad Myntri Rangbah ka Assam, u Himanta Biswa Sarma ki la ïakynduh ïa ka Myntri tnad pla tyngka ha New Delhi ha ka Sngi Balang ban ïakren halor ki Externally Aided Project (EAP) haba ïadei bad la ki jong ki jong ki Jylla.
Haba thoh ha X, u Conrad u la ong, “Nga la ïakynduh ïa ka Myntri tnad pla tyngka ka Sorkar Pdeng, @nsitharaman ji lem bad u Myntri Rangbah ka Assam, Dr. @himantabiswa ji ban ïakren halor ki mat ba ïadei bad ki ‘Externally Aided Project’. Nga ai khublei ïa ka Myntri tnad pla tyngka ka Sorkar Pdeng kaba ju kyrshan barabor ïa ki jingangnud jong ka Meghalaya bad ka Thaiñ Shatei Lam Mihngi.”
Haba batai shuh-shuh shaphang katei ka jingïalang, u Sarma u la ong ba ka jingpynleit jingmut ka long ban kyntiew ïa ka ‘Capital Expenditure’ (pisa ba la pynlut) ha ka thaiñ.
“Da ka jingthmu ban kyntiew ïa ka ‘Capital Expenditure’ sha ka Thaiñ Shatei Lam Mihngi ka India, nga ryngkat bad u Myntri Rangbah ka Meghalaya, @SangmaConrad Ji ngi la ïoh ïa ka jingïalang kaba manbha bad ka Myntri ka tnad pla tyngka ka Sorkar Pdeng, @nsitharaman Ji,” thoh u Sarma ha ‘X’.
U la ong, “Ngi la pynshong nia ïa ki jingpynsngew jong ngi ban wanrah ïa ka jingshimkhia haba phai sha ka jingsted jong ki ‘Externally Aided Project’ ha baroh ar tylli ki Jylla jong ngi, ki ban plie ïa ki lad thymmai na ka bynta ka jingbei tyngka ba ïadei bad ki jingtei bad ha ka liang ka imlang-sahlang. Ka Myntri Pla Tyngka ka la jubab ha ka rukom kaba manbha bad pyntikna sha ngi ïa ka jingshimkhia na ka Sorkar India ban ïaid shakhmat bad kane ka jingthmu pynroi ba kongsan.”
Ïa ki EAP la pyntreikam da ka jingbei tyngka na ki ‘agency’ jong ka pyrthei kum ka ‘World Bank’, ‘ADB’ bad ka ‘JICA’ bad ki long kiba kongsan ban bei tyngka ïa ki projek jingtei ba kongsan lem bad ki jingtei ha ka imlang-sahlang ha ka Thaiñ Shatei Lam Mihngi.
