Nongpoh, Nailur 09
Ki Nongïalam bad dkhot jong ka Meghalaya Commercial Truck Owners & Drivers Association (MCTODA) ha ka sngi Balang ki la poi ha Nongpoh ban leit sha ka miej jingïakren kaba la khot da ki bor pynïaid district ka Ri Bhoi halor ka jingbym don jong ki jaka sangeh kali kiba biang harud ka surok bah kaba la buh jingeh shikatdei ïa ki trai bad nongñiah trok haba ki ïaid lyngba ka district.
Ha kane ka jingïa-lang kaba la pynlong ha Conference Hall jong ka District Rural Development Agency (DRDA) ha Nongpoh la wan ban ïadon bynta naduh u Dr. Abhishek Saini, Deputy Commissioner ka Ri Bhoi, ki Additional Deputy Commissioner, ki ophisar na ka tnad Transport, NHAI, NHIDCL, ki heh pulit ka Ri Bhoi, ki trai Petrol Pump, ki ophisar na ka District Road Safety Committee jong ka Kamrup na Assam lem bad ki nongïalam bad dkhot ka MCTODA hapoh ka jingïalam u Bah Moslander Marngar kum u President.
Haba kren sha ki lad pathai khubor hadien ka jingïalang, u Bah Moslander u la ïathuh ba ka jingeh ka dei hadien ka jingpyntreikam ïa ka hukum kaba la pynmih da ka Supreme Court ban khang ïa ki kali ban ïeng harud surok na ka bynta ka jingshngaiñ jong ki paidbah nongleit nongwan kiba bun balang.
U la ong ruh ba ka jingpyntrei ïa kane ka aiñ jong ka Supreme Court khlem da pyrkhat lang ïa ka jingeh ki nongñiah kali heh, kan nang wanrah shuh shuh ïa ki jingjia ba sngewsih ha ka jaka ba kan pynduna, naba ka long kumba la shu pynbor ïa ki nongñiah ban ñiah wat lada ki la thait la swai, ne don jingthud ka kali bad kiwei kiwei de ki daw.
U la ïathuh tang shu rung ha Ri Bhoi District, ki nongñiah kali ki sngewkhia jingmut bad shem shitom shikatdei namar ki sngewthuh ba kim don jaka pynïeng kali la ka dei haba ki shitom, ka jingthud ka kali ne kiwei-kiwei de ki daw, hynrei kila hap ban shu ñiah jubor, namar lada ki leh pyrshah ruh kin ngat ha ka aiñ.
U Bah Moslander u la ïathuh ruh ba ka seng kala dep ban ai da ka jingthoh sha ka ophis u DC Ri Bhoi halor ki jingeh kaba ki nongñiah kali ki ju kynduh na ka por sha ka por bad pynpaw ïa ka jingsngewkmen ba ki dang don ki ophisar paradoh parasnam kiba sngewthuh bad kyrshan ïa kine ki jingeh ba la wanrah da ka seng hakhmat u DC ka Ri Bhoi.
U Bah Moslander u la ïathuh ruh ba na ka liang ki bor pynïaid District ka Ri Bhoi kila shimkhia ïa kane ka kam bad pyntip ba shen hi kin sa pynlong ïa ka jingleit jurip lang ïa ki jaka na ka bynta ban shna ïa kita ki lay-by ne ki jaka pynïeng kali heh ha ki rud surok bah bad namar kane ka dei ka kam ïap kam im, ka MCTODA kala kyntu jur ba ïa kane ka kam la dei ban pynurlong noh shen khlem da pynslem shuh.
