Shillong, Nailur 09
Ka North East Students’ Organisation (NESO) ka la pynrem jur halor ka jingïap jong u nongtem na Manipur, u Chongtham Vikram Singh (55 snem ka rta) ha ka thaiñ shathie lam mihngi ka nongbah Delhi bad dawa pynlong da ka jingtohkit kaba buh por, ka bym shah liang haba ïadei bad kane ka jingjia.
U Singh, uba sah ha Kilokari, u la khlad noh hadien ba la kynnoh ba u la shah thombor ha ka kynhun ki shynrang briew habar ïing jong u, haba u la pyrshah ïa ka jingpynthut bad jingpynwit kaba la mih.
Ha ka kyrwoh pynrem, ka NESO ka la ong ba ka sngewsih jur ba ka jingpynskhem ïa ka hok ba kongsan ban ïoh jingsuk hapoh ïing lajong ka lah ban ïalam sha ka jingduh noh ïa ka jingim.
Kane ka kynhun kaba kynthup ïa 8 tylli ki seng samla pule ba heh ka Thaiñ Shatei Lam Mihngi, ka la dawa ban leh eiei mardor ïa baroh kiba donkti bad dawa ruh ba dei ban ai ïa ka jingpynshitom kaba tyngeh katkum ka aiñ.
Ka NESO ka la ong ba ïa kane ka jingjia, hap ban shim ha ka jinglong kaba kham ïar jong ka jing-isih jaidbynriew bad ka jingshah thombor kaba ki briew na ka Thaiñ Shatei Lam Mihngi ki mad ha ki jaka thor ka ri India.
Ka la kdew ba ki samla pule, kiba trei bad ki nongshong shnong na ka thaiñ kiba sah shabar ki la ujor la slem haba ïadei bad jingkren beiñ jaidbynriew, ki jingshah kren da ki ktien ba khor, ki jingshah thombor bad ka jingshah kyntait ha ka imlang-sahlang tang namar ka jinglong ka dur ka dar bad ka jaka ba ki wan.
“Ïa kine ym lah ban shim ba ki dei ki jingjia kiba tang kumne-kumtai. Haba ki nongshong shnong ka Thaiñ Shatei Lam Mihngi ki sngew ba kim shngaiñ ne kim shah pdiang sngewbha ha ri lajong, ka pynmih ïa ka jingsngewkhia kaba jur halor ka jingshngaiñ, ka burom bad ka jingïaryngkat jong ki,” ong ka NESO.
Ka seng ka la kyntu ruh ïa ki pulit ka Delhi bad ka Sorkar Pdeng ban pyntikna ïa ka jingtohkit kaba khuid ba shai bad ban pynkhlaiñ ïa ki lad jingïada bad jingpynsngewthuh ban ïada ïa ki briew na ka Thaiñ Shatei Lam Mihngi.
Na ka liang ka NESO ka la phah ruh ka jingsngewlem sha ka longïing jong utei u rangbah bad sha ki paidbah ka Jylla Manipur.
