Shillong, Nailur 09
U Symbud Myntri Rangbah ka Jylla ba dei peit ïa ka tnad kam pohïing u Bah Prestone Tynsong u la ong ba ka Sorkar kam lah ban shu sngap jar haba ïadei bad ka jingpynthut ïa ka suk ka saiñ, da kaba ïada ïa ka jingleh jong ki pulit pyrshah ïa ki nongïalam ka KSU hadien ka jingkulmar ha ka 19 tarik u Nailar ha ka por ba ka seng ka pynlong ïa ka jingïaid paidbah da ki thuk thuk.
Haba jubab ïa ki jingkynnoh ba la kem naphang ïa ki nongïalam ka KSU, u Bah Prestone u la ong ba ka aiñ ka hap ban pynshitom ïa kiba leh be-aiñ khlem da kheiñ ïa ka seng ne ki riew shimet kiba donkti.
“Ngi la kren shai bha ha ki ba kano-kano ka kam be-aiñ ym lah ban sngap jar, la ka long ïano ïano ruh. Lada phi thaw jingklumar ban pynthut ïa ka shongsuk shongsaiñ, kumno ngin shu sngap jar? Khlem da kheiñ la ka dei ka KSU ne kano-kano ka seng treimon sngewbha ne uno-uno u riew shimet, na ka liang ki pulit, ngi sngewkhia ïa ka aiñ bad ka shongsuk shongsaiñ,” ong u Bah Prestone.
U la kyrpad ïa baroh ki nongshim bynta ban kiar na ki kam kiba ïalam sha ki jingeh ha ka aiñ bad ka suk ka saiñ.
“Ngi kwah ban kyrpad ïa baroh ki nongshim bynta ba kin kiar na ki kam be-aiñ ne na kaba thaw ïa ka jinglong jingman kaba ïalam sha ki jingeh ha ka aiñ bad ka suk ka saiñ. Kane ka dei ka khubor kaba nga kwah ban phah,” u la bynrap.
Halor ka jingdawa kaba la slem bha ban buh ïa ki Facilitation Centre kumba la bthah katkum ka Meghalaya Residents Safety and Security Act (MRSSA), 2016, u Bah Prestone u la ong ba ka rukom treikam ka dang ïaid shakhmat.
“Shen, yn sa pynlong ïa ka jingjurip lang da ki bor synshar District ha Umling. Ha ka jingshisha, ka Sorkar Jylla ka la dep ban shaniah ha u Deputy Commissioner ban leh ïa ka jingjurip lang,” u la ong.
