Shillong, Nailur 09
Ka Meghalaya kala kynshew tyngka haduh kumba T.750 klur ha ki jingtei ha ka koit ka khiah ha kine ki 5 snem kiba la dep lyngba ki lad bad ki tyllong bei tyngka ki bapher-bapher.
Ïa kane la pynpaw da u Myntri Rangbah ka Jylla u Conrad K Sangma ha ka jingïalang khmih bniah ïa ka tnad ka koit ka khiah kaba la pynlong ha ka sngi Balang. U Myntri Rangbah u la khmih bniah ïa ka jingïaid jong ki kam pyntrei ha kylleng ki district jong ki projek Sub Centre, Primary Health Centre, Community Health Centre bad hospital.
Ka Jylla Meghalaya ka thmu ruh ban pynïar ïa ka rukom treikam ka jong ki Health Sub Centre sha ka 700 tylli hapoh u bnai Lber 2027, ha kaba palat 200 tylli ki dei kiba la khmih lynti ban pyndep noh ha katei ka por kaba la buh.
Palat ïa 110 tylli ki Sub Centre ki dei kiba la pyndep ha kine ki 2 snem kiba la dep, katba ki kam jong ki 200 tylli kiwei pat ki dei kiba la buh thong ban pyndep ha u bnai Lber jong u snem ban wan. Kane ka jingpynïar ka dei kaba la khmih lynti ban pynbha ïa ki lad ban ïoh jingshakri ha ka koit ka khiah khamtam ha nongkyndong bad ki jaka kiba jynjar bad shitom ban poi.
Ka jingkyntiew kyrdan bad ka jingtei kiba dang ïaid shakhmat ha ki jaka ai jingsumar ha Bajengdoba, Byrnihat, Mahendraganj, Raksamgre bad Mylliem Umthlong ki dei kiba la jan dep artad. Ka Sorkar ka don ïa ka jingthmu ban pynlong ïa kine ki jingtei kiban treikam noh hapoh jong u bnai Kyllalyngkot 2027.
Ka hospital 100 jingthiah ha Resubelpara ka dei ruh kaban sa pyntreikam noh shen.
Kine ki projek kiba ïaid shakhmat ha ki jingtei bad jingkyntiew kyrdan kin nang kyntiew sa 600 jingthiah na ka jingdon kaba mynta kaba 7,000 jingthiah ha ki jaka ai jingsumar jong ka Sorkar.
Ka Sorkar kala pynpaw ba kine ki jingpynïar kila wan ha ryngkat bad ka jingdon ïa ka jingkiew ha ka liang ka koit ka khiah. Katkum ka kaiphod kaba dang shen, Meghalaya Health Trends: Progress and Priorities, kala pyni ïa ka jinghiar ka jingkhlad ki khunlung ha ka Jylla kala hiar bha haduh 40 percent ha kine ki 5 snem kiba la dep, na ka 3,064 ha 2020-21 sha ka 1,833 ha u 2025-26, katba ka jingïap ki kmie kiba punkhun kala hiar haduh 57 percent ha kitei ki snem.
Ka jingleit kha khun ha ki jaka sumar kala kiew na ka 51.4 percent ha ka NFHS-4 sha ka 65.6 percent kaba la kynjoh ïa ka 79 percent ha u snem 2025-26. Ka jingai dawai tika ki khynnah rit kala kiew na ka 63.8 percent sha ka 75.3 percent katba ka jingshim ki longïing ïa ka Health Insurance kala kiew na ka 34.6 percent sha ka 74.9 percent.
Ka Sorkar kala ong, ba ka jingpynleit jingmut mynta kan long ha kaban pyndep ïa ki projek kiba dang ïaid shakhmat bad ban pynthikna ba ïa kine ki jingdon jingem kiba thymmai dei ban pyntreikam noh mardor.
