Shillong, Nailar 20
U nongaiktien ka Voice of the People Party (VPP), Dr. Batskhem Myrboh ha ka Sngi Ba-ar u la ong ba ka liang pyrshah hapoh ïingdorbar thawaiñ ka Jylla ka kynthup sa tang 9 ngut ki nongmihkhmat khlem da kheiñ shuh ïa MLA ka Congress, Bah Ronnie V. Lyngdoh.
U Dr. Myrboh u la ong ïa kane haba kren halor ka jingmih noh ki 3 ngut ki MLA ka Congress – Dr. Celestine Lyngdoh (Umsning), Bah Charles Marngar (Mawhati) bad Bah Gabriel Wahlang (Nongstoiñ) ban leit pynïasoh sha ka NPP ha ka Lah Sngi U Blei.
Haba kdew ba ka liang pyrshah ka la tlot lypa, u nongaiktien ka seng u la ong ba ka Congress ka dei hi ka Sorkar ha ka liang pyrshah namarba ka ïatreilang bad ka NPP ha KHADC.
“Te ngin ïakren aïu shuh, ka dei tang ban pyndep rukom hapoh ïingdorbar,” u la ong da kaba bynrap ba ka Congress ha Meghalaya kam ai shuh ïa ka jingshakri sha ki paidbah.
“Kito kiba ong ba ki kwah shakri ïa u paidbah…pynkhlaiñ ïa ka liang pyrshah bad ngan ïaroh ïa kata ka jingong jong ki,” u la ong.
Haba pynsngew ba ka jingmih jong kitei ki 3 ngut ka la nang pyntlot shuh-shuh ïa ka liang pyrshah kaba la ieh noh sa tang ïa VPP bad ka TMC (ha ka liang pyrshah), u Dr. Myrboh u la buh jingkylli ba u MLA ba marwei ka Congress un kren aïu hapoh ïingdorbar haba ïalade u ïatreilang bad ka NPP hapoh KHADC.
“Kaba mut ba ha ka Jylla mynta, ngi don 9 ngut ha ka liang pyrshah, Bah Ronnie ngin ym kheiñ shuh,” u la ong.
Haba kylli, u la jubab, “Balei ngin kheiñ haba ha KHADC u ïatreilang bad ka NPP. Ha kawei ka kyrdan phi ïatreilang, ha kawei pat phi pynpaw sha ka pyrthei ba phi don ha ka liang pyrshah, kam don jingmut…kam ïahap. Ka Congress ka don ha ka liang pyrshah tang ha ka kyrteng.”
Ha kawei ka liang, u la ong ba haba phai sha ka Jylla, naduh mynshuwa, ïa ka dor jong ka liang pyrshah, ki briew kim sngewthuh bad ka daw ba ka Jylla ka hiar haduh katne, dei namarba ki briew kim sngewthuh ïa ka dor jong ka liang pyrshah.
“Dei ka liang pyrshah kaba peitngor ïa ka Sorkar, hynrei hangne, phin ïohi ïa ki nongmihkhmat jong ngi kim treh ban peitngor ïa ka Sorkar. Ki kwah ban ïadon bynta bad ka Sorkar ban ïaleh katba mon bad kam don shuh ka jingkitkhlieh ïa u paidbah,” u la ong.
