Shillong, Nailar 20
U Captain ka Shillong Lajong FC u samla Hardy Nongbri u don ka jingkyrmen ba ki rangïalehkai ka Shillong Lajong FC kin ïakhun tyngeh ban pynliem ïa ka East Bengal da ka jingkyrshan jong ki paidbah kiba wan sakhi ha jingïalehkai Quarter Final ka Durand Cup ka ban long ha ka Sngi Balang ha madan Jawaharlal Nehru Stadium, Shillong ha ka por 7:00 baje janmiet.
Watla u slap u la ther tyngeh mynta ka sngi naduh dangstep hynrei ki rangïalehkai ka Shillong Lajong FC kim shym la kynrandien hynrei ki la mih beit sha madan jong ka Sports Authority of India (SAI) ban kilanmet khnang ban lah ban ïalehkai bha lashai ka sngi pyrshahïa ka East Bengal kaba dei ka kynhun kaba ïalehkai ha ka Indian Super League.
U Nongsaiñ Hima u la leit ban ïakynduh kyrpang ïa u samla Hardy Nongbri shwa ban sdang ban kilanmet ha SAI mynta ka sngi khnang ban sngap ïa ka jingpynkhreh jong ki haba kin ïakhun ïa ka East Bengal.
U samla Hardy u dei shnong trai na Mawkriah, Upper Shillong bad u la rung bad ka Shillong Lajong naduh u snem 2011 bad naduh u snem 2023 u la shah jied ban long Captain haduh kine ki sngi ba mynta.
U la ïathuh ba naduh ba bna ba ka Durand Cup kan long ha Shillong u la sngewkmen namar u don jingkyrmen ban jop ïa ki kynhun ïalehkai na rithor namar ki paidbah ka jylla ki dei kiba ieid ia ka jingïalehkai phutbol bad mynta ka la urlong haba ki paidbah ki la wan ban kyrshan ha madan Polo.
Kumta u la kyrpad ïa ki paidbah ban wan kyrshan biang lashai ka sngi ha JN Stadium khnang ba ki rangïalehkai baroh kin ïoh mynsiem ban ïalehkai bha ban ïoh jingjop ïa ka East Bengal.
Ha kawei pat ka khubor, ki paidbah naka shnong Bataw kaba hap ha East Jaiñtia Hills District hapoh ka jingïalam u Waheh Shnong, u Bah Skhem Sumer kin mih palat spah ngut na shnong kynthup ïa ki kynthei bad ki shynrang ban leit sha Shillong ban kyrshan ïa ka Shillong Lajong lashai ka sngi.
Haba ïoh ban ïakren bad u Bah Skhem u la ïathuh ba ki paidbah jong ka shnong ki la sngewshitrhem ban leit kyrshan ïa ka Shillong Lajong namar dei tang ma ka, ka kynhun na Meghalaya ban ïakhun ïa ki kynhun na kiwei ki jylla ha Ri India khamtam ha kane ka jingïalehkai Durand Cup kaba long ha Shillong.
U la ïathuh ba ki paidbah kin don kiban shong da kabos, kin don kiba shong da kali rit bad kin sa mih na shnong ha ka por 9:00 baje mynstep bad ki kyrmen ba kin poi sha Shillong ha ka por 3:00 mynsngi shwa ban sdang ka jingïalehkai ha kapor 7:00 baje janmiet.
