Shillong, Nailar 20
Ka shlem pule jong ka Women’s College Shillong ka la pynlong da ka jingïaid kjat kaba jar-jar ha ka Sngi Ba-Ar kum shibynta ban pynpaw ïa ka jingpyrshah halor ka jingthombor pyrshah ïa ki kynthei khynnah.
Ha kane ka jingïaid kjat la wan ban ïadonlang da ki nongpynïaid bad ki nonghikai ha ryngkat ki samla pule jong kane ka kolej. Kane ka jingïaid kjat ka la sdang naka phyllaw jong ka kolej bad shaduh Laitumkhrah Point, Fire Brigade, St. Edmund’s College, Dhankheti, Don Bosco bad wanphai pat lyngba ka Upper New Colony.
Kane ka jingïaid kjat ka long kum shibynta ban pynpaw ïa ka jingsngewlem halor ka jingshah leh be-ijot bad pynïap jong kawei ka doktor ha kawei ka jaka sumar ïa kaba la tip kum ka RG Kar Medical College and Hospital kaba don ha nongbah Kolkata.
Wat hapdeng u ‘lapbah uba jur, ki samla pule ki la ïashim bynta ha kane ka jingïaid kjat da kaba rah ruh ïa ki ‘placard’ kiba don ïa ki jingthoh ban pynrem ïa ki nongleh bymman bad ki jingthoh sngewsynei ïa katei ka doktor kaba la ngat ha kane ka apot.
Kajingshah leh be-ijot bad jingshah pynïap jong katei ka doktor kaba la jia ha Kolkata ka la pynkhih win shikatdei ïa ka Ri baroh kawei ha kaba ka jingdawa ka long ba ka dei ban ïoh ïa ka jingbishar ba hok.
Haba kren ha kane ka sngi, na ka liang kawei ka nonghikai jong ka Women’s College, ka la ong ba kum kawei na ki jaka pule jong ki khynnah kynthei ka long kaba donkam ban pynlong ïa kane ka jingïaid kjat ban pyrshah jur ïa ka jingshah thombor bad jingshah leh be-ijot jong ki kynthei bad khynnah namar kum kine ki kam thombor pyrshah ïa ki kynthei ki la jur shaba palat ha kine ki por kiba mynta khamtam hapoh ka Ri India.
“Man la ka sngi, ngi ïohsngew ba ka don ka jingthombor ïa ki kynthei ym tang ha Kolkata, hynrei wat hapoh Bangalore kaba ngi ju ïohsngew ba ka long ka jaka kaba shngaiñ ruh hynrei ka la don ka jingthombor,” la ong ka nonghikai.
Katei ka nonghikai ka la ong ba ki ju mih ki jingong ba hap ban hikai ïa ki kynthei ba kin trei kin ktah, hynrei lada kum ki kynthei kim don wat ïa ka jingshngaiñ ha ki jaka trei, haei kata kan long namar kiba bun ki kmie ki kpa ki sheptieng ban phah ïa ki khun kynthei jong ki ban leit trei ne ban leit pule da kaba bynrap ba ka Sorkar ka dei ban pynthikna ïa ka jingshngaiñ na ka bynta ki kynthei.
Ka la kren ruh halor ka jingdonkam ban ai jinghikai halor ka akor ka burom da kaba pynshong nongrim ba ka long kaba donkam eh ha kane ka por kaba mynta ban ai jinghikai ïa ki khynnah shynrang.
Shuh shuh ka la pynkynmaw ruh ba katkum ka kaiphod jong ka tnad pulit ka Jylla Meghalaya, ki la don haduh 628 tylli ki mukotduma halor ka jingshah thombor jong ki kynthei bad khynnah, bad kine ki dei kiba la dep ban pynrung tang ha u snem 2023.
