Chennai, Nailar:
Naba ki la jandon 761 tylli ki dukan kiba la shah khang namar ka jingdie beaiñ ïa ki duma bam bad ki duma dih bad ki jait jingbam myllen kiba ktah ïa ka koit ka khiah ha palat hynriew bnai ba la leit ha Madurai distrik, ki nongshong shnong bad kumjuh ki Councillor, ki la pynpaw ba ki sngewïahap ha kaba ïadei bad ka jingpyntreikam ba la wanrah da ka Food Safety Department ha Dindigul.
Kumba la buh jingkheiñ da ki heh ba dei khmih, la ong ba ki la don palat 3,200 kilograms ki duma ba la khang ban die ba la ïoh ban kurup hapdeng u bnai Naiwieng 2023 bad u Jylliew, 2024, bad haduh `. 1.30 klur la ïoh ban lum kum ka jingdaiñ kuna. Ha ka jingïakren bad ki nongthoh khubor, u CS Raj Mohan, uba long u Ward Councillor na Dindigul, u la ong, “Ka jingdie beaiñ ïa u duma bam bad dih bad ki jingbam kiba ktah ïa ka koit ka khihah ka long ka mat kaba kongsan hangne ban khmih bniah, bad ki nongdie ki ju pynbiang ïa kine baroh na ka bynta ki samla bad ki khynnah pule. Ïa kine ki jingbam bad ki jingdih kiba ktah la ju die ha ki dukan rit. Ngi ai ka jingkyrshan halor kane ka jingpyntreikam ba la shim da ka tnat ba dei khmih halor ki jingshngaiñ jong ki jingbam.”
U Secretary jong ka Tamil Nadu Vanigar Sangam (Dindigul) u K Mubarak ha ka jingïakren bad ki nongthoh khubor u la ong, “Ki la don shibun ki jaka kiba don ha ki thaiñ kiba kham sha kyndong jong ki thaiñ nongkyndong hapoh ka Dindigul distrik, khamtam ha ki thaiñ kum ha Vedasandur, Vadamadurai bad Natham. Kiba bun na ki jaka die ïa kine ki jait jingbam bad jingdih ki die ha ki dukan kiba rit, kane ka la pynshem shitom ha ka ban lap ïa ki da ki pulit bad ki heh jong ka Food Safety Department. Shuh shuh la ïathuh ba ka jingïohnong na kaba die beaiñ ïa ki duma bam bad dih ki long lai shah haba ïanujor bad ki jingbam kiba dei bam bam, kum ki soh bad kiwei pat, ha kaba kane ka la pynlong ïa kiba bun ba kin die ïa kum kine ki jingbam bad ki jingdih kiba lah ban pynïoh kamai kaba heh na ka jingïohnong haba die ïa ki. Ngi pdiang ïa kane ka jingpyntreikam ha ka ban khang ïa kum kine ki jait dukan.”
