Riyadh, Nailur:
Katkum ki khubor, la ong ba 73 ngut ki la mynsaw ha ka jingleit thombor jong ki lehnoh Houthi jong ka Yemen, kiba ju io ioh jingkyrshan da ka Iran, ha ki jaka sah riew paidbah bad ki jaka kamai jong ka Saudi Arabia. Ka tnat bor ding jong ka Gulf Kingdom ka la ong ba bun tylli ki jaka pynmih bor ding bad ki jaka buh bor ding kiba don hapoh ka jylla ba shathie jong ka ki la hap hapoh ka jingshah thang jong ki Houthi.
Kane ka jingkynnoh ka long ruh ha kum kane ka por ba ka jingiakynad ka la nang jur ha Yemen, ha kaba ka sorkar ba la kyrshan da ka Saudi Arabia bad ba la ithuh da ka pyrthei, ka la sdang ïa ka jinghiar thma pyrshah ban shim biang ïa ki jaka na ki lehnoh Houthis ba la kyrshan da ka Iran. Ki Houthi, ki kynnoh ba ka Riyadh, ka la pynlong ïa ki jing thombor, kynthup ïa ka jingbthei bom kaba pyniap ïa kawei ka phatok, ha kaba 11ngut ki briew, ki la iap.
Ki Houthi, kiba synshar ïa ki bynta ba bun briew tam jong ka Yemen bad shibun ki bynta jong ka thain shatei lam mihngi, ki la kam ïa katei ka jingshah thombor da ki namding bad ki drone. Ki lehnoh ba la kyrshan da ka Iran, ki la iathuh ba ki la thombor ïa ka Abha International Airport, ka ktem liengsuiñ King Khalid bad ki jaka ba dei jong ka kompeni heh umphniang jong ka sorkar Aramco ha Abha bad Jizan, hajan u pud ba ki iasam lang.
Katba ka Riyadh, ka la kular ban jubab tyngeh ïa ka jingmih kaba dang shen jong ki jingïaleh pyrshah. Ki bor synshar jong ka Saudi bad ki lad pathai khubor ba thikna ki la iathuh ba ki jingshah thombor ki la wanrah ïa ka jingpluh bad ka jingkhang shipor. Ki video kiba la pynmih ha ki social media, ki pyni ïa ki jaka pynmih umphniang ha Saudi Arabia, kiba don hapoh ka jingbthei hadien ba la shah thombor ha ki drone bad ki namding jong ki Houthi.
