New Delhi, Nailur:
U Lamphang ka Lok Sabha u Om Birla ha ki khyndiat sngi ba la leit, u la ai por haduh ka 22 tarik Nailur ïa ki 20 ngut ki MP jong ka Nationalist Citizens Party of India (NCPI) ba kin jubab ïa ki jingpynbna ba la pynmih sha ki hadien ki jingujor pynduh kam ba la mudui da ka Trinamool Congress (TMC) ba la ïalam da ka Mamata Banerjee katkum ka aiñ pyrshah ïa ka jingphet seng.
Ïa kane ka jingpynjlan por la ai hadien ba ki MP ka NCPI ki la pan por shuh shuh ban jubab ïa ki jingpynbna ba la pynmih da u Birla ha ka 26 tarik u Nailar.
Ki jingpynbna ha kaba sdang ki la ai por ïa ki hynñiew sngi ban aiti ïa ki jubab jong ki, la ïathuh ka tnad pathai khubor, kaba la kdew na ki tyllong khubor jong ka Parliament.
U Birla ula pynmih ïa kine ki jingpynbna hadien ba u Abhishek Banerjee u nongïalam ka TMC u la mudui da ki dorkhas ban pynduh ïa kitei ki 20 ngut ki MP.
Ki MP ki la mih noh na ka TMC ha u bnai Jylliew hadien ba katei ka seng ka la shah rem ha ka elekshon sha ka ïingdorbar thawaiñ jong ka West Bengal bad ki la pynïasoh ïalade bad ka seng NCPI kaba dang duna bha ka jingtip. Hadien kane ki la pynbna ba kin ïaieh sha ka seng NDA kaba la ïalam da ka Bharatiya Janata Party.
Kane ka rai jong u Lamphang ka long hadien katto katne sngi ba ka Supreme Court ka la mynjur ban bishar ïa ka jingkyrpad jong u Abhishek Banerjee uba pan ïa ka rai kaba kloi halor ki jingujor ban weng ïa ka kam.
Ha ka 25 tarik u Nailar, ka ïingbishar kaba kynthup ïa u Chief Justice Surya Kant bad ki Justice Joymalya Bagchi bad ka V Mohana ki la pynmih ïa ki jingpynbna sha ki 20 ngut ki MP bad bthah ba dei ban leh kloi ïa ka jingbishar hakhmat u Lamphang dorbar.
U Abhishek Banerjee u la leit sha ka Supreme Court hadien ba u la mudui ïa ki dorkhas ba kyrpang hakhmat u Lamphang ha u bnai Jylliew ha kaba u la pan da kaba leh eiei pyrshah ïa ki MP kiba la mih noh na ka TMC bad pynïasoh ïalade bad ka NCPI.
Ka por ba la pynjlan ka ailad kham bun ïa ki MP lehnoh ban pynkhreh ïa ki jubab jong ki katba ki dang pyrkhat ïa ki jingktah ha ka liang ka aiñ bad ka saiñ pyrthei jong ka jingbishar, la ïathuh ki tyllong khubor.
La sngewthuh ruh ba ki MP ki dang pan jingmut na ka liang ka aiñ halor ka jingtreikam jong ki kyndon pyrshah ïa ka jingphet seng ha ka mukotduma jong ki.
Ka jingïakynad halor ki 20 ngut ki MP jong ka Lok Sabha ka dei ka jingpynbthei kaba khatduh eh ha ka jingïapher jong ka seng kaba kham heh hapoh ka TMC hadien ka jingshah rem jong ka ha ka elekshon ha West Bengal.
Ka kynhun pyrshah ka la wad ruh ban pyni ïa ka jingkyrshan jong ka hapdeng ki nongmihkhmat ba la jied da ka seng ha ka ïingdorbar thawaiñ jong ka jylla.
Haduh 65 ngut na ki 80 ngut ki MLA jong ka TMC ki la kyrshan ïa ka jingdawa jong ka Ritabrata Banerjee ïa ka kam Nongïalam ka Liang Pyrshah, da kaba kyntait ïa u kyrtong ba la kyrshan da ka kynhun ka Mamata Banerjee
Ka jingkynriah jong ki 20 ngut ki MP sha ka NCPI bad hadien kata ka jingïasoh bad ka NDA ka la pynkylla mynta ïa ka jingïakhun bor hapoh jong ka TMC sha ka jingïakhun kaba kham heh ha ka liang ka aiñ bad ka saiñ pyrthei halor ka jingïoh nongmihkhmat jong ka seng ha Parliament.
