Patna, Nailur:
Ki la don kumba 20 ngut ki briew, kiba la ïap bad palat 22 lak ngut kiwei pat ki la shah ktah ha ka jingshlei um ha ki 12 tylli ki distrik jong ka Bihar, wat haba ka wah Ganga, ka la sdang hiar ha ka lah sngi U Blei. Hynrei ka jinglong jingman jong ka jingshlei um ka dang long kaba jur bha.
Kumba la ïoh jingkheiñ la ong ba ha Saran, ki la don kumba 5 ngut kiba ïap, bud sa ka Patna da saw ngut, ka Bhojpur, lai ngut, Bhagalpur, arngut bad ha Begusarai, Purnea, Lakhisarai bad Jamui, ki don mar iwei.
Ka sorkar jylla ka la pynbna T.4 lak kum ka jingïarap pisa na ka bynta ki bahaïing jong kito kiba la khlad noh.
Ki la don kumba 12 tylli ki distrik ha shilynter jong ka Wah Ganga kiba kynthup ïa ka Buxar, Bhojpur, Patna, Vaishali, Saran, Begusarai, Samastipur, Khagaria, Munger, Lakhisarai, Bhagalpur bad Katihar, kiba shah buh ha ka jingpynkhreh kaba jur hadien ka jingkiew ka um jong ka wah.
Ha Patna, ka wah Punpun, ka la pynshlei ïa ki shnong ba marjan, kaba la wanrah ïa ka jingeh ïa ki nongshong shnong. Hynrei u Myntri Rangbah ka jylla u Samrat Choudhary u la ong ba ka um jong ka wah Ganga ka la sdang ban hiar naduh ka step jong ka lah sngi U Blei, kaba la wanrah jingsuk ïa ki nongshong shnong ha ka nongbah jong ka jylla.
U Choudhary u la jurip ruh ïa ki jaka shet jingshet jong ki paidbah ha ki District Vaishali bad Saran.
U la bam ja miet bad ki briew kiba sah ha ki jaka pynlong jingïalang bad u la pynthikna ïa ki ïa ki jingïarap baroh kiba lah ban ïoh.
U la bthah ïa ki heh sorkar ban pynthikna ïa ka bam, ka jingkhuid jingsuba bad ki jaka sumar.
U Myntri Rangbah u la ong ba ka sorkar jylla kan sa rah ïa kane ka mat sha ka Central Water Commission (CWC) ban wad ïa ka lad kaba neh ban weng ïa ka jingshlei um kaba ju wan biang ha Bihar.
U la sam ruh ïa ki cheque ba 4 lak tyngka sha kiba haïing hasem jong une u nongïap. Ha kajuh ka por, ka jingshlei um ka lah ban nang jur ha ki katto katne ki distrik namar ba ka jingshlei um ka dang bteng ha kylleng ka jylla Bihar.
Ka Meteorological Department ka la pynmih ïa ka jingmaham ban husiar na ka jinghap slap ha ki 13 tylli ki District jong ka north Bihar.
La ïathuh ba u slap un jur bha ha Supaul, Samastipur, ha Sitamarhi bad ha Darbhanga.
La khmih lynti ruh ba kan don ka lyer kaba jur haduh 30 kmph ha ki katto katne ki jaka, ryngkat bad ka jingthaba leilieh bad tied pyrthat. Ka Meteorological Centre ka la bthah ïa ki nongshong shnong ba kin long kiba husiar bha ha ka por ba sniew ka mariang.
Ki katto katne ki bynta jong ka Bihar, ki la ïoh ïa ka jinghap slap kaba jur ha ki 24 kynta ba ladep.
Ka Munger ka la ïoh 73 mm, bud sa ka Patna 68 mm, ka Banka 67 mm, ka Muzaffarpur 65 mm, bad ka Jamui bad ka Siwan 55 mm marwei.
Hynrei ka Bihar ka la ïoh ïa ka jingduna kaba 35 percent ha ka jinghap slap ba la lum lang ha kane ka aïom.
