Bengaluru, Nailur:
Kum shi bynta ban kyntiew ïa ka jingpynmih bording na ka sngi hapoh ka skhim Kusum-C jong u Myntri Rangbahduh, ka sorkar jylla ka dang wad ban pyndonkam ïa ki jaka ba la kheiñ kum ki khlaw ha ki jaka bapher bapher jong ka jylla, da kaba sdang na Chikkaballapur bad ki jaka ba marjan.
U Deputy Commissioner ka Chikkaballapur u G Prabhu u la ong ba ki don haduh 20,000 hectare ki jaka ba la kheiñ kum ki khlaw hapoh bad sawdong ka distrik kiba lah ban pyndonkam na ka bynta ban pynmih bording na ka sngi.
Ban pyntreikam ïa kane ka projek, la pynlong ïa ka jingjurip lang da ki heh jong ka bor synshar distrik ryngkat bad ki tnad khajna bad ki tnad khlaw ban ithuh ïa ki jaka.
U Prabhu u la ong ba yn buh ha ka jingmut ïa ki kyndon jong ka ïingbishar ba ha khlieh duh kiba ïadei bad ki jaka bad ka jingtap rong saw ba la buh ha ka por ba jurip.
Shisien ba la ithuh, yn sa aiti ïa ki jaka sha ka sorkar jylla ban ïoh ïa ka jingïakren bad jingbthah, hadien kata yn sa pyndonkam ban buh ïa ki solar panel na ka bynta ban pynmih bording hapoh ka skhim Kusum-C, u la ong.
Na baroh ki jaka ba la shim ba ki dei ki khlaw, ka sorkar ka dang peit 11,000-12,000 hectare na ka bynta ban pynmih bording na ka sngi, da kaba thmu ban ïarap ïa ki nongrep ha katei ka distrik, ong u Prabhu.
U la kren ïa kane ha shilynter ka jingïakren kaba bniah bad ki lad pathai khubor halor ka jingpyndonkam ïa ki jaka sorkar bad ki jaka rep/riew shimet na ka bynta ka skhim bording Kusum-C.
Ka sorkar ka la sdang ruh ban tap ïa ki jaka Lakebed. U Managing Director jong ka Bangalore Electricity Supply Corporation (Bescom) u la ong ba hapoh kane ka skhim, la buh ïa ki solar panel ha ki jaka sorkar ne ki jaka riew shimet/ki jaka rep ban pynmih bording na ka sngi, ïa kaba la pynpoi sha ki Feeder kiba don hapoh ka jingjngai kaba 6-8km, na kaba la pynpoi ïa ka bording khlem sangeh sha ki jaka rep.
Hapoh kane ka skhim, la pyndonkam ruh ïa ki jaka ba don ha ki pung na ka bynta ban buh ïa ki solar panel. La leh ïa ka projek kaba jop ha ka pung Kundana ha Devanahalli, ha kaba 40 akar na ka jaka jong ka pung baroh kaba 120 akar la pyndonkam na ka bynta ban buh ïa ki solar panel ban pynmih ïa ka bording kaba 16MW.
U Shivashankara u la ong ba kane ka dei kaba nyngkong bad kaba heh tam ha Karnataka haduh mynta. U la pynshai ba ki jaka ba don ha ki pung ki dang shah ithuh bad ka tnad ai um rit bad ka bor pynneh pynsah bad pynroi ïa ki tank jong ka Karnataka. Kumjuh ruh la bud ryntih ïa ki jingbthah jong ka National Green Tribunal, ki hukum jong ka ïingbishar bad ki kyndon jong ka KTCDA haba pyndonkam ïa ka jaka jong ka pung.
Ïa ka jingjrong jong ki solar panel la pynkiew sa 1.2m haba ïanujor bad ka jingjrong kaba ju long ban pynthikna ba ka jingkiew jong ka um ha ka por slap kaba bha kan ym ktah ïa ki panel bad ka jingpynmih bording. Ïa ki panel ha ki thliew pung la buh ha ki jaka bym don um, u la ong.
Ka jingbuh ïa ki solar panel ha kiwei pat ki 8 tylli ki pung ruh ka dang ïaid shakhmat. Haba kynthoh ïa ka jingpyndonkam ïa ki jaka ba la shim ba ki dei ki khlaw, ki heh khlaw ki la ong ba kam don kano kano ka hukum ban aiti ïa ka jaka sha ka sorkar jylla.
Ka Supreme Court, ka la bthah ban leh biang ïa ka jingjurip ha Karnataka. La leh ïa ka ha ka jingïatreilang bad ka tnad khajna ha ka rukom kaba suki bha.
La pyrshang ruh ban pynkiew ïa ki jaka ba la kheiñ kum ki khlaw ha ka jylla ban pynbha ïa ka jingtap kaba jyrngam na ka 20 percent kaba la don mynta sha ka 33 percent kaba donkam.
