Shillong, Nailar 20
Ka jingïakhih jong ka Synjuk ki nongtrei SSA kiba don hapoh ka lama jong ka All Meghalaya SSA Non-Teaching Staff Association(AMSNSA)kaba la kot sha ka 21 sngi, ka la poi noh sha kaba kut ha ka Sngi Ba-Ar.
Kum ban shu kdew, ki nongtrei SSA hapoh ka Jylla ki la pynlong ïa ka jingïakhih kaba khlem buh por ha Madan Malki, Shillong naduh ka 31 tarik u Naitung 2024 ban dawa na ka Sorkar Jylla ba ka dei ban kyntiew tulop noh ïa ki nongtrei hadien phra snem ba ka la sah kumjuh.
Na ka liang ka Synjuk ka la dawa na ka Sorkar Jylla ba ka jingkyntiew tulop ïa ki ka dei ban long beit 80% ym tang 25% kumba la kular da ka Sorkar bad dawa ruh ba ka Sorkar ka dei ban kyntiew tulop 2% ïa ki nongtrei kiba la rangbah bad kiba la neh slem ha ka kam bad 5% ka jingkyntiew tulop kaba manla u snem.
Haba ïakren bad ki nongthoh khubor ha ka Sngi Ba-Ar, na ka liang ka President ka Synjuk, ka Kong Jennyfer June Synrem, ka la ong ba ka daw ba ka Synjuk ka la weng ïa ka jingïakhih ka dei hadien ba ka Sorkar ka la kular ban ai ïa ki jingdawa jong ki kata ban kyntiew ïa ka tulop jong ki nongtrei kiba la rangbah bad trei kham slem ha ka kam bad ka jingkyntiew tulop ïa ki nongtrei kaba manla u snem bad watla ka Sorkar ka khlem ai jingkular satia ïa ka Synjuk ha kaba ïadei bad ka jingdawa jong ki ban kyntiew tulop kaba 80%, hynrei ka la kular pat ban ai da ka Base Pay.
“Ka daw ba ngi mut ban weng noh ïa kane ka jingïakhih jong ngi kaba la ïaid mynta la 21 sngi ka long namarba ngi la ïoh ïa kita ki jingdawa jong ngi kaba mut ka 2% ka jingdawa ban kyntiew tulop na ka bynta ki nongtrei kiba la rangbah bad kiba la neh kham slem ha ka kam bad ïa ka 5% ka jingkyntiew tulop kaba manla u snem bad ïa ka jingdawa kaba 80% ban kyntiew tulop pat kam da long than hynrei ngi la ïoh ïa ka ‘Base Pay’ jong ngi,” la ong ka President.
Ka Kong Synrem ka la ong ba ka jingsiew da ka ‘Base Pay’ ka long ba uno-uno ne kano-kano kiba dang shu sdang treikam thymmai kin nym ïa ryngkat ka jingsiew bad kito ki nongtrei kiba trei kham slem ha ka kam bad ka la ïathuh ba ka dei ha ka sien kaba hynriew ba na ka liang ka Sorkar ka la ai ïa ki jingdawa jong ka Synjuk.
Haba kylli halor ka daw ka jingpynslem jong ka Sorkar ban ai ïa ki jingdawa jong ka Synjuk, ka Kong Synrem ka la ong ba ka daw ka dei na ka jingbym hun jong ki nongtrei hi namar ki la don katto-katne ki kynrum kynram hangne-hangtei khamtam ba ka la dei ka kam kaba la neh kham slem.
“Ban pynbeit ïa ka kam kaba la rim ka dei kaba eh tang hapoh 21 sngi, ngi donkam da ki 3-4 bnai. Namarkata ka daw ka sa kyllaiñ bad jynjar haduh katne-katne ka dei namar ngi hap ban pynïabiang,” la bynrap ka Kong Synrem.
Shuh shuh ka Kong Synrem ka la ong ba ha ka Rationalisation Committee la pynryngkat ïa ka jingsiew naduh ka Block Level, District Level, State Level bad kam don shuh kata ka jingbym ïa ryngkat ha ka jingsiew.
Ka la ong ba ka Synjuk ka la kyntait ïa ka 25% ka jingkyntiew tulop ïa ki nongtrei ba la tyrwa da ka Sorkar namar ha katei ka 25%, kumba shiteng na ki nongtrei ki khlem don hapoh ka 25% ka jingshah kyntiew tulop.
Na ka liang ka Synjuk ka la ai khublei ïa u Myntri Rangbah ka Jylla, u Conrad K. Sangma halor ka jingailad jong u ban thaw ïa ka ‘Rationalisation Committee’ kaba lah pynurlong ym tang ïa ki jingdawa jong ki, hynrei ki la ïoh ruh pat sa ïa kiwei ki lad jingmyntoi kiba kum ki nongtrei SSA kim ju ïoh.
