Shillong, Nailar 20
Ka Select Committee ba la thaw da ka Ïingdorbar Thawaiñ ka Khasi Hills Autonomous District Council (KHADC) ban peit bniah ïa ka kaiphod jong ka Delimitation Committee halor ka jingpynbeit thymmai ïa ki shnong ha ki konstitwensi MDC bapher-bapher ha ka jingïalang kaba la shong ha ka Sngi Ba-Ar, ka la shim ïa ka rai ba kan ïaid lang ryngkat bad ka sur jong ki paidbah bad nongïalam shnong kiba la wan ban pynsngew halor ka jingkwah jong ki bad ym ban ïaid pyrshah ïa ka mon jong ki.
Haba kren sha ki lad pathai khubor hadien ka jingïalang, u Bah Pynshngaiñ N Syiem, Deputy Chief Executive Member ka KHADC bad u Chairman ka Select Committee, u la ong ba ki don ki katto-katne ki bynta kiba ka Select Committee kan ym lah ban pynhun lut ïa baroh da ka jingpyrshang ban pynïaryngkat khnang ba ki jaka kin ym rit ne heh than khnang ba kan nym don kano-kano ka jingktah.
“Ïa kaei ka jingpynsngew jong ki, ngi la pyrshang katba lah ban shah shkor bad ban pdiang ïa ki jingkyrpad jong ki lait noh hangne hangtei kiba ngim banse,”la ong u Bah Pynshngaiñ.
U u la ïathuh ba ki don ki shnong kiba la wanrah jingthoh sha ka Committee ba kim kwah ban pynkynriah na kawei ka konstitwensi sha kawei pat bad don pat kiba angnud ban shah pynkynriah noh sha kawei ka jaka.
U la ong ba ki don sa tang katto-katne tylli ki jaka kiba ka Select Committee ka dang sah ban pynbeit bad kan bishar khatduh ïa ki kam baroh ha ka Sngi Balang.
Na ka liang u Bah Bindo M. Lanong, MDC bad dkhot ka Select Committee, u la ong ba ha ka jingïalang la pyrkhat sani bha bad katkum ka jingïalang kaba la dep shong, kaba bun ka kam ka la long kaba seisoh, hynrei lehse, kin don pat ki paidbah na ki katto-katne ki shnong ki ban shem ïa ki jingduna.
Na ka liang u Bah Titostarwell Chyne, MDC, bad dkhot ka Select Committee, u la ong ba ka jingthmu jong ka Delimitation Committee ka long kumno ban pynbeit bad pynïaryngkat ïa ka jingdon jong ki nongthep vote. Hynrei hapdeng kane ka kam kaba dang ïaid, ki la mih ki shnong kiba la wan dalade ha ryngkat ka sur jong u paidbah kaba la pynpaw ba kim mon ïa ka rai kaba la leh da ka Delimitation Committee.
“Haba kim mon ngim lah ban pynbor bad ngi hap ban sngap. Ki don ki shnong kiba mon bad ki don pat ki shnong ki bym mon,” la bynrap u Bah Titos.
