Shillong, Risaw 07
U Myntri ka koit ka khiah ka Jylla, u Bah Wailadmiki Shylla ha ka Sngi Balang u la ong ba ka Sorkar Meghalaya ka sngewkhia shi kat dei eh haba ïadei bad ki shnong ki bym pat don ïa ki lad pynïasoh bad ka jingshah ktah jong ki halor ka jingïoh bynta ha ka liang ka koit ka khiah, hynrei u la ban jur ba ka jingshimkhia ïa ki jingtei ka la nang ïaid shaid-shaid shakhmat sha ki kyrdan ba halor.
Haba kylli la hato u la pynsngew ne em ïa ka mat ba ïadei bad ki jingshakri ha ka liang ka koit ka khiah kiba shah ktah namar ki surok ba sniew ha u Myntri Rangbah ka Jylla, u Bah Wailad u la jubab, “Peit, kam dei tang namarba ngi ap ïa ka jingjia ba kan jia. Kumba nga la kdew ha ka jingïakynduh ba la dep bad ki nongthoh khubor, lada phi ïohi naduh ba la ïoh Jylla lajong, nga tharai ba ha kine ki 7-8 snem ba la dep, ngi la shimkhia ha ka ban shna ïa bun tylli ki surok.”
“Hynrei kumba nga la ong, ngim lah ban leh lut shisien leh namarba ngi don ïa shibun ki bynta kiba kongsan ki ban hap peit,” u la bynrap.
Haba pynkynmaw biang ïa ka jingthmu jong ka Sorkar, u Myntri u la ong, “Ka Sorkar ka sngewkhia shi kat dei bad ngi pyrshang katba lah khnang ba baroh ki shnong ki bym pat don ki lad pynïasoh kin ïoh ïa ka jingpynïasoh lyngba ki surok kiba biang. Kam long kaba suk ban leh ïa baroh shisien leh. Hooid, ka Sorkar ka pyrshang katba lah ban pyntikna ba baroh ki shnong ki bym pat don ïa ki lad pynïasoh kin ïoh ïa ka jingpynïasoh bad ki surok kiba biang.”
